Ramthar Veng fiahna tur Police

Star Cement MPL13-ah vawiin chawhma dar 11:30 hian Mizoram Police leh Ramthar Veng te Durtlang Football Stadium-ah an inkhel dawn. Inkhel hi Zonet Zawlbuk leh YouTube aṭangin a en theih ang.

MPL kai thar Ramthar Veng leh Police te hian chak loh an la nei lo ve ve a, point li ve ve an hmu mek. HC Zarzoliana enkawl Ramthar hian an match hnuhnung berah Saikhamakawn an hneh a, chakna goal hi injury time-ah K. Lalfakzuala khung a ni.

Ramthar Veng tan tlarhnung player-te an che ṭha ṭhin a, MLS nen goal awm loa an inhnehtawk ṭumin Joshua Vanlalrinliana Ngente chu player of the match-ah thlan niin SKK an hneh ṭumin goal hmahruai khungtu Eddie Lalhmangaihzuala thlan a ni leh bawk.

Coach Zara kaihhruai Ramthar Veng hian MPL-a tawnhriat nei ṭha Bengaluru FC midfelder hlui Malsawmzuala bakah Dinthar forward hlui Lalawmpuia, Venghuai midfielder hlui T. Vanlalruata bakah Chanmari FC forward hlui Lalremruata te an kawl a, Police squad an elpha.

Chutihrualin Police lamah pawh senior player leh player naupang zawk an inpawlh rual ṭha. Goalkeeper ṭha bik F. Lalmuanawma an kawl a, MPL leh I Day Football an champion ṭuma player pawimawh F. Lallawmkima leh Isaak Malsawmkima te an neih leh tawh bawk avangin Ramthar Veng lakah point thum an beisei ngam ang.