Liverpool player thar Bradley Barcola

Premier League club Liverpool chuan hun rei tak an lo rim tawh, Paris St-Germain forward Bradley Barcola chu an chang ta a, pound maktaduai 123-in an la lut.

Kum 23 mi forward hi PSG lam hian £145mtd lai an chhiar a, hei vang hian Reds nen pawh an inrem lawk thei lo. Mahse, a tawpah chuan £123mtd-in an inrem ta.

Liverpool hian £106mtd an pe phawt ang a, a khelh ṭhat dan a zirin £17mtd pek belh tur a ni ang - France international hian Anfield-ah kum nga chhung atan contract a ziak nghal bawk.

Barcola chuan, "Kan indawr hun chhung a rei viau a, mahse, a tawpah chuan Liverpool ka zawm thei ta. Khelmuala luh a, inkhelh theih ka châk tawh hle," a ti.

Liverpool hian nipui transfer an hmang ṭha tawk lo, tiin fans tam takin an sawisel a, winger Victor Munoz, defender pathum Jeremy Jacquet, Ronald Araujo leh Ifeanyi Ndukwe te an la lut a, tunah chuan Barcola hmanga belhchhahin an awm leh ta.

Barcola chuan, "He club-ah hian thil ropui tak kan tih theih ka beisei a, ka nuna ka thil châk ber chu Premier League nomawi chawi a ni a, kan tih theih ngei ka beisei.

"Chu nomawi beisei chung chuan he team hi ka pan a, chuvang chuan contract pawh hun rei zawk atan ka ziak - kan champion theih ngei ka ring tlat a ni," a ti a, Reds tan number 29 a ha ang.

Barcola hian season hman zawh takah khan PSG tan inelna hrang hrangah match 49 khelin, goal 13 a khung a, assist vawi sarih a nei.

French forward hian kum 2023 khan Lyon aṭangin PSG hi £38.5mtd-in a zawm a, Ligue 1 nomawi pathum, Champions League (2), French Cup (2), UEFA Super Cup leh FIFA Intercontinental Cup te a lakpui a, Liverpool-ah hlawhtlin chhunzawm zel a beisei ang.

Premier League transfer hi tukin zing dar 3:30-ah khan a tawp a, he thuziak i chhiar meuh chuan transfer langsar tak tak a thleng leh nual tawh ang.