Old Trafford-ah Man United an hrang

Khualmuala chak loin Manchester United-in Premier League-ah bul an ṭan a, an mual Old Trafford-a an match hmasa berah erawh team dang daih an ni. Michael Carrick-a hoten Pathianni zan khan kai thar Ipswich Town 5-2 in an sawp.

Tractor Boys-in Leif David hmangin khung mah se Bruno Fernandes-a'n Man United tan hattrick a siam a, Ipswich defender Jacob Greaves-a'n an lama a tihluh bakah Bryan Mbeumo-a'n a khung belh bawk. Mikhual team hian injury time-ah Chuba Akpom hmangin an khung belh a, Old Trafford-a hlimna a ti dal pha lo.

Hello Baleba

Man United-in an player thar Carlos Baleba an pho chhuak a, Cameroon international hi hliam vangin a la inlan thei lo thung. Michael Carrick-a'n chak loh nawn a tum lo a, Hull City hneh lotu aṭangin player pali ngawt a thlak.

Tlarhnungah Ayden Heaven leh Noussair Mazraoui te aiah Lisandro Martinez leh Diogo Dalot te an lut a, player thar Andrey Santos aiah Kobbie Mainoo lutin Dorgu aiah Marcus Rashford a inlan bawk.

Tlarhnung pawp leh goal

Manchester United-in chak duhin attacking football an khel a, tlarhnung pawp sa erawh a phui phah lo. Fernandes leh Rashford te hmangin tlarhnung rum ṭhaih viau mah se Ipswich lamin goal chance an nei ve tho.

Luke Shaw-a'n beisei a pha lo chhunzawm a, English defender hian Ipswich player a um nasa. Julio Enciso pawhin chance ṭha bik a nei a, goalkeeper Senne Lammens-a'n a dang. Belgian keeper hian Daizen Maeda goal khung tur pawh ṭha takin a dang leh bawk.

Tractor Boys-in goal an khung ta a, Shaw-a'n Abdul Fatawu a umpha lo nasa. Ipswich Town winger Fatawu cross chu Leif Davis-a'n goal-ah a chantir a, minute 29-naah 1-0 in hma an hruai. Davis-a chance vawi hnihna erawh Lammens-a'n a dang tawh thung.

Bruno Hattrick

Hull City lakah Man United an tlawm tawh a, kai thar Ipswich laka an tlawm leh a nih chuan, hei aia chhiaa season bul ṭan dan a awm lo ang. Hun harsaah captain Bruno Fernandes a rawn pen chhuak.

Minute 40-naah Matheus Cunha-a ball fing chu Fernandes-a'n um lutin forward ang maia chaka a tlan hnuah ṭha zetin a pet lut. First half-ah goal luh belh lo mah se Fernandes-a goal khat zarah Carrick-a hote nuamsa zawkin second half-ah an khelh theh phah.

Midfield-ah Mainoo-a'n a thiam thil a pholang a, hetiang renga a khelh chuan Bruno nen khelhna hmun an chang chiang dawn. United midfielder pathum lakluh tharten khelhna hmun ruak pakhat an inchuh turah a ngaih theih.

United tana Rashford-a chance siam chu goal ruakah Mbeumo-a'n a khung lo a, crossbar a tih per. Mahse, minute 56-naah Maguire ball pet kawh zetin Greaves a per hnuah goal-ah a lut, own goal-a chhiar ni thung.

Carrick-a hote an che ṭha chhunzawm a, Cunha penalty hlawhchhuah chu minute 61-naah Fernandes-a'n penalty aṭangin a khung. Goal thum an khung hnuah United goal bawh a na lehzual a, Rashford-a pawh mual vei lamah a hlauhawm hle.

Minute 68-naah Mainoo ball pet chu kawh tawk lo mah se a per chu Mbeumo-a'n pet lehin a per chu Bruno zawnah a tla a, cool takin United captain-in a khung. Season liam taa assist record siamtu Bruno hian minute 82-naah Mbeumo khung tur a siam sak a, Portuguese midfielder hi a khel ṭha takzet.

Man United-in nawr zui mah se an khung belh tawh lo a, Ipswich zawkin an khung thung. Lisandro Martinez fimkhur loh vangin Enciso lakah ball a hloh a, injury time-ah Chuba Akpom-a'n a khung. Inkhel a tawp zui a, Carrick-a hote 5-2 in an chak.