Zaninah Division One Futsal Final

Mizoram Football Association buatsaih MFA Futsal Division One 2026-27 Season Opening Tournament chu zanin dar 7:30 hian FC Muthi leh F. Lalrinpuia Memorial FC ten an khel dawn. Division One club-te an intluk tawk hlawm a, final-ah pawh rinkai zawk an awm lo.

Muthi hi Mizorama futsal khelh ṭantirh aṭanga khel ṭan ve nghal an ni a, futsal-ah chuan team ṭha an ni. Final lut turin Saron club Tsuki FC chu 9-5 in an sawp a, Edward Lalruatkima leh Daniel Rampanvara ten hattrick an siam ve ve. Edward leh Daniel ten final-ah pawh inrintawkna an ngah dawn.

Ramthar Veng club F. Lalrinpuia Memorial FC hi club indinthar ni mah se futsal lamah sulhnu an nei ṭha a, MFA Futsal League ṭantirha Whetstone FC te tho kha an ni. Club hming put chhan F. Lalrinpuia hi MFA hruaitu hlun a ni. Er Rinpuia hi kum 1989 khan MFA Office Bearer a ni tawh a, Mizoram Volleyball Association-ah pawh President ni tawhin kum 2017-2020 chhung khan Mizoram State Sports Council-ah Finance Secretary a ni bawk.

MFA-ah honorary vice president hna a chelh laiin January 20, 2023 zan khan cancer natna vangin a thi a, Mizoram infiamna tan channa lian tak a ni. Tun ṭumah hian F. Lalrinpuia hriat reng nan Ramthar Veng ṭhalai an rawn thawk chhuak dawn a, nomawi chawi ngei an tum ang.