Subroto Cup final-ah Mizoram hmeichhe team chak lo

65th Subroto Cup International Football Tournament-ah Mizoram aiawha kal NCC (Springfield HSS) ten final hial thleng mah se nomawi inchuhnaah Jharkhand lakah 2-0 in an chak lo. NCC team-te hian nomawi chawi ta lo mah se final hial an thlen phak avangin Mizoram hming an tiṭha hle.

Final hi Dr. Ambedkar Stadium, New Delhi-ah August 27, Ningani zan khan khelh a ni a, entu an ṭha hle. Mizoram hi chak zo lo mah se captain Ṭhuamdinpuii chu best player-a thlan a ni a, Mimbung tleirawl hi Mizoram team khai dingtu pawimawh a ni.

Mizoram aiawha tel NCC team hian rilru leh thinlung takin an khel tih an chetzia aṭangin an lang. JH Lalnunpuii ball chan laiin referee-in inkhel a ham tawp a, Melbuk tleirawl hi an chak loh avangin a tlu sawp nghal a, a player puite bakah an coach te pawhin an tuar hle.

Mizoram hian kum 2012 khan Subroto Cup hmeichhe final an khel tawh a, kum 14 hnuah final lut leh chauhin nomawi erawh an la chawi lo thung. Kum 2012 khan Grace Lalrampari bakah tun ṭuma coach K. Lalhruaizeli (Nupuii) te chu player pawimawh an ni. Grace hi India aiawh thlengin a khel zui bawk.

Nupuii leh a ṭhiannu Lalthansangi te Mizoram football tan an thawh hlawk hle. ITI Veng nula Nupuii leh Bilkhawthlir nula Thansangi te hi National referee an ni a, an taksa an vawn avangin Mizoram Premier League-ah pawh match official an ni ṭhin. Coaching lamah pawh AFC C Licence an nei a, hmeichhe football tan an thawh hlawk hle.