Aizawl FC-in SKK an sawp nawn

Aizawl FC-in I Day Football quarterfinal-ah Saikhamakawn 4-0 in an sawp a, Star Cement MPL13-ah 5-0 in an sawp nawn. AFC tan Khawbel tlangval Zomuansanga'n goal hnih khungin Vanlalramnghaka, PC Pazawna leh Laltlanzova ten goal khat ṭheuh an khung bawk.

RG Stadium-a inkhelah SKK-in goal venhim an ngai pawimawh a, coach R. Lalruatfela hoten first half-ah inkhel thunun mah se goal an khung thei lo. Chutihrualin goal chance nei ṭha zawk erawh SKK an ni a, RM Zothansanga ball pet ṭha zet chu AFC keeper RS Lallawmzuala'n a dang ṭha hle.

Chhum zing vangin inkhel a khaihlak a, SKK ṭan theih chin a tawp bawk. Minute 60-naah Zomuana'n ṭha zetin a khung a, Khawbel tlangval hian minute 76-naah a tauh lut leh a, SKK keeper Bawihpuia tihsual a ni thung.

Saikhamakawn lam an talbuai chhunzawm a, minute khat hnuah Vanlalramnghaka hmangin an khung lehnghal. Zohnuai tlangval Ramnghaka'n fak a phu a, SSK tlarhnung erawh a pherh takzet. PC Pazawna'n minute 82-naah AFC tan a khung a, Laltlanzova'n minute 88-naah chak nemnghehna goal a khung.

Aizawl FC 5-0 in an chak a, I Day Football chhiar telin match nga chhung goal an chhuah tawh lo. Coach R-a hote hian Inrinni tlai dar 3:00-ah Lawngtlai club MLS FC an hmachhawn ang.