PFA player of the year Bruno

Manchester United captain Bruno Fernandes chu Professional Footballers' Associations player of the year-ah thlan a ni a, hmeichhe lamah Manchester City forward Khadija Shaw thlan a ni. Bruno leh Shaw te hian 2025-26 season-a Football Writers' Association player of the year chawimawina an dawng tawh bawk.

Season liam ta khan Fernandes-a'n Premier League-a assist record thar siamin vawi 21 zet a ṭhiante a siamsak a, Manchester United player zingah Wayne Rooney (2010) hnua PFA award dawng leh thei hmasa ber a ni. Man United-in season liam ta khan nomawi chawi lo mah se Portuguese midfielder chet ṭhat zarah tun season-ah Champions League an khel dawn.

Season liam ta khan Fernandes hian assist vawi 21 a neih bakah goal kua a khung a, match 35 inlanin a record hi a chhuanawm tham hle. Fernandes hnaihtu ber Man City midfielder Rayan Cherki-a'n assist vawi 12 a nei a, an inthlauhna hi a tam tham hle.

Fernandes hian January 2020 khan Sporting Lisbon aṭangin Manchester United a zawm a, season liam ta kha a hman ṭhat avangin Arsenal trio Gabriel Magalhaes, David Raya leh Declan Rice bakah Manchester City duo Cherki leh Erling Haaland te aia thlan a ni.

Kum 2007 leh 2008 khan chawimawina hi Man United winger hlui Cristiano Ronaldo-a'n a dawng a, Fernandes hi Ronaldo hnua Portuguese player chawimawina dawng leh thei hmasa ber a ni bawk.