City-in Gakpo an ngaihven

Manchester City chuan Liverpool forward Cody Gakpo chu lakluh tumin an ngaihven a, he thu buatsaih a nih lai hian official taka club indawrna erawh a la awm lo thung.

Kum 27 mi forward hi Tottenham Hotspur pawhin an ngaihven a, season hmasa lama beisei a phak loh avangin Reds ṭantute zingah a tlatlum lo sawt hle.

Mahse, tun season Premier League-a Liverpool match hmasa berah pawh Gakpo hi inlanin, goal ṭha bik a khung a, Kop ho chuan an ui rilru leh tawh mai thei!

Gakpo hian 2024-25 season-a EPL nomawi an chawi khan inelna hrang hrangah match 49 khelin goal 18 a khung a, assist vawi sarih a nei. Mahse, season hman zawh takah khan match 52 khelin goal kua chiah a khung a, assist vawi ruk a nei bawk.

Enzo Maresca enkawl City hian tun hnaiah, Lille midfielder Ayyoub Bouaddi chu pound maktaduai 85.6-a la lut turin French club hi inremna an neihpui a, £81.4 mtd an pe phawt ang - £4.2mtd hi a khelh ṭhat dan a zira pek belh tur a ni.

City hian Nottingham Forest midfielder Elliot Anderson chu £116mtd-in an la lut tawh a, Chelsea midfielder Enzo Fernandez chu £120mtd-a lakluh theih inbeiseiin an la ngaihven reng bawk.

Manchester khaw club hian Palmeiras winger Allan Elias la lut turin Brazilian club hi £34mtd-in inremna an neihpui tawh bawk a, Maresca-a'n a duh danin team thuam ṭhat hna a thawk mek.

Hetihlai hian City hian player pawimawh Rodri chu Barcelona-ah £65mtd-in an kaltir a, Tijjani Reinders chuan Saudi Arabia club Al Qadsiah chu £52mtd-in a zawm a, captain Bernardo Silva chuan free transfer-in Real Madrid a zawm bawk.