Nupuii'n Taekwondo Championship-ah gold la

5th National Kyorugi Taekwondo Championship neih zawh takah Vanlalthlamuanpuii (Nupuii) chuan gold a la a, Zemabawk nula hian gold a lak avangin World Junior championship-ah India ai a awh dawn a ni.

Pune, Maharastra-a neih inelnaah Nupuii hi Junior Female Under-55kg ah a inlan a, a tumpui zawng zawngte straight set vekin a hneh thei! Nupuii hian a match hmasa berah Maharashtra nula hmachhawnin, 5 - 4, 3-0 in a hneh nghal.

Quarterfinal-ah Haryana nula chu 11-2, 7-3 in a hneh leh a, semi final-ah Assam aiawha inlan nula chu 16-0, 16-0 teh meuha sawpin, final a lut chiang hle. Final-ah hian Madhya Pradesh nen inhmachhawnin, 4-0, 8-4 a hnehna changin, gold medal a lo hawn a ni.

Nupuii hi Exodus School Taekwondo Club aṭanga inzir chhuak niin, kuminah ringawt national level-a gold medal a lak vawi hnihna a ni - May thla khan 2nd Federation Cup National Taekwondo Championship-ah MATA Vision Olympic player Ramdingliani nen Mizoram tan gold medal an lo la tawh.