Police hmaa ding tur Dinthar FC

Star Cement MPL13-ah vawiin tlai dar 3:00 hian Mizoram Police leh Dinthar FC te an inkhel dawn. Lalbiaksanga Colney kaihhruai Police hian tun hma pha lo deuh mah se dah hniam an rem lo a, Dinthar pawh hian club ngelnghet zia an nei tlat.

Season liam ta khan Dinthar FC-in Police hi an intawn hmasak ṭumin 3-1 in a hneh a, an vawi hnih intawnnaah 3-3 in an inhnehtawk. Match hnih lek aṭangin goal 10 a lut a, team pahnih hi an inhlauh loh tawn avangin tun ṭumah pawh goal a beisei theih ang.

I Day Football aṭanga thlir chuan Dinthar FC hian champion an beisei ngam dawn niiin a lang a, chumi tur chuan midfielder Lalbiakzuala leh Lalchhanchhuaha te an pawimawh dawn. Coach Laldampuia'n I Day Football 2025 best player Lalnunzira ṭhatna ang taka a khelh chhuahtir theih a pawimawh bawk dawn.

Police lamah erawh, "Hnah hlui an ṭil zo a, hnah thar lo chawr ang hian," tih thu ang deuhin MPL ṭantirh lama kum upate hna chhawk zângkhai turin player naupang zawk an lak belh. Mahse, player upa ṭhenkhatin hmun pawimawh an la chelh dawn. Police captain tur pawh Lalbiakhlua (Biaktea) a ni a, MPL ṭantirh aṭangin player pawimawh a ni reng a, a invawnna ringawt pawh a fakawm hle.

Nimin khan Mizoram Police-in MPL13-a an jersey tur chu Commandant 3rd Bn. MAP leh Mizoram Police FC chairman Ruatsanga Ralte-in a tlangzarh a, an jersey hi Trustwell sponsor a ni. BS-a Colney hoten hnehna nena bul ṭan an tum dawn.