City chak laiin Liverpool chak zo lo

Premier League Big Six zingah Manchester United an tlawm hmasa ber a, Tottenham Hotspur-in an hnung an zui - Liverpool chuan Pathianni zanah club pahnih hnung an zui ve leh a, Newcastle United lakah an chak zo lo.

Magpies hian Anthony Elanga leh Joe Willock hmangin vawi hnih hma an hruai a, Liverpool tan Cody Gakpo leh Dominik Szoboszlai ten si phurh an sut - Szoboszlai hian hun pek belh minute kuanaah si phurh sutna goal penalty hmangin a khung ve chauh!

Reds inlan hma hian coach thar Enzo Maresca hnuaia khel Manchester City an inlan a, 2-1 in Bournemouth an hneh. Mahse, Etihad Stadium-a khel City hi inchhuang thei an awm bik lo.

Cherries hian Marcus Tavernier-a hmangin, hma takah hmahruaina goal an khung a, minute 84-naah Marc Guehi chuan si phurh sutin, hun pek belhah Joško Gvardiol chuan chakna goal a khung thung.

City phawt

Kum 10 hnua a vawi khat nan City-in Pep Guardiola tel loin season bul an ṭan a, Spanish manager ropui tel lo chuan rin an hlawh tawk lo - City rin harsatna belhchhah turin minute 26-na lekah goal an chhuah nghal a, a khungtu chu Tavernier a ni.

Tavernier-a goal khungna kawngah City tlarhnung chu dem theih an ni a, a duh thala hmun awl an pe! Community Shield-ah City hian 3-0 ngawtin Arsenal an lo ngam lo tawh a, an mualpho nawn dawn niin a lang hman.

City tan Erling Haaland langsar mah se, Norwegian striker hi Pathianni zan inkhelah hian 'a ṭhelhtupa' a ni ber a, goal a khung hleithei lo. Mahse, rin loh lam aṭangin Guehi a inlar - Rayan Cherki corner aṭanga ball kal chu English defender, a career-a a vawi thum nana defensive midfield-a khelhtir hian a khung.

Mahse, City tan Etihad Stadium-a Cherries draw hi a la ṭha tawk lo. Hun pek belh minute khatnaah Josko Gvardiol a inlar a, City defender hian chakna goal a khung - offside vangin pawm ni lo zet mah se, pawm a ni leh a, City an vannei.

Chak zo lo

Liverpool-in result ṭha zawk beiseiin, coach Arne Slot an ban a, mahse, Andoni Iraola hnuaia an match hmasa berah an chak zo lo - St James' Park-a inkhelah goal an chhuah hma a, minute ngana lekah Anthony Elanga chuan hmahruaina goal a khung.

Reds-in nawr mah se, goal hmaah an hriam tawk lo a, Trabzonspor tana goal hnih khungtu Mohamed Salah an ngai ru viau ang! Goal dang awm loin chawlhlawk hman a ni a, minute 55-naah erawh Reds an vannei ta nge nge.

Tottenham Hotspur nena sawizawm Gakpo chuan goal ṭha bik khungin, Liverpool tan si phurh a sut. Mahse, Magpies hian Joe Willock hmangin an khung leh a, 2-1 a ni. Liverpool-in beidawng loin an nawr a, a tawpah chuan player thar Victor Munoz-a'n penalty a hlawh chhuak.

Penalty pet turin Szoboszlai a lo pen chhuak a, Hungarian midfielder hian goal-ah a chantir. Liverpool mualpho lutuk tur chhanhimin an awm a, Iraola tan hnathawh tur a la tam tih erawh a lang.