Durand Cup leh a kalphung

Kum 1888 aṭanga khelh ṭan tawh Durand Cup hi Asia khawmualpuia football tournament upa ber a nih avangin ngaihhlut a hlawh a, tun season-ah hian ṭum dang angin ISL club tel an tam lo thung - panga an inlan.

Durand Football Tournament Society-in Indian Army leh AIFF hriatpuinaa a huaihawt ṭhin niin, state sorkar engemaw zat an thawhpui bawk a, ISL club leh IFL club bakah hian sipai team leh state league club hrang hrangte organiser hian inelnaa tel turin an sawm ṭhin.

India rama club langsar bera chhal ngam pahnih, East Bengal leh Mohun Bagan telna tournament a nih avangin sawi nep theih a ni lo a, tournament hawnna pawh hi India President chenna Rashtrapati Bhavan-ah neih a ni.

Durand Cup hawnnaah pawh hian Lallianzuala Chhangte chu 'star player' anga sawm bik a ni a, India president Droupadi Murmu hmaah Lunglei tlangval hian thu a sawi hial.

Team 24 tel zinga panga chu ISL club niin, IFL club pahnih an tel bawk. I League 2 club hi pathum niin, I League 3 team pali an tel a, state league aiawh panga an awm.

Sipai team aṭangin Indian Air Force, Indian Army, Indian Navy leh CISF Protectors ten inelna an hmachhawn bawk a, foreign team pakhat telin, Sri Lanka Army an ni.

Inelna hi Kolkata, Ranchi, Shillong, Guwahati leh Imphal-ah te khelh a ni a, team 24-te hi group parukah, team pali zel awma ṭhen hran an ni a, group tina a sang ber leh, pahnihna tiṭha zual pahnihten quarterfinal an lut nghal a ni.