Hattrick siam ka inring sa - Edmund

Mizo striker Edmund Lalrindika chuan Kolkata derby-ah hattrick siam a inrin sa thu a sawi a, ṭhenkhat tan awihawm lo a ni hial mai thei. Mahse, a ni miau si.

Edmund chuan, "Ka inkhelh hma hian ka uin min ṭawngṭaisak ṭhin a, Durand Cup final hma pawh khan phone hmanga inbiain, min ṭawngṭaisak a, hattrick ka siam theih nan Pathian hnenah a dil tawp mai a ni.

"Ka uin khatia Pathian hnena a dil avang khan keipawhin hattrick ka siam kha ka inring ve tawp! Goal kha khung lo reng ta ila, ka inring kher lo mai thei a, mahse, ka goal hmasa ber ka khung kha chuan hattrick ka siam loh hi ka ring tawh lo," tiin Vanglaini a hrilh.

Edmund chuan sawi zawmin, "Inkhel thei tawh lo tur hiala an sawi khawpin ka inhliam a, mahse, khatihlai pawh khan ka u nen kan ṭawngṭai nasa a, kha khan ka rinna kawngah pawh nasa takin min pui. Ka uin min ṭawngṭaisak khan, hattrick ka siam ka ring tawp," a ti!

Lunglei tlangval chuan hattrick a siam zawha a rilrua awm hmasa ber Vanglaini hrilhin, "Thil dang a awm lo. 'Lalpa nangmah ngei i ni e' tih hi a ni tawp a, 'Lalpa, ka lawm e' ka ti mawlh mawlh mai a ni. Pathian hnathawh a ni tih kha a chiang em a ni," a ti - Edmund hian a goal hmasa ber a khung hnu hian a kut tuamna a kawk a, van lam a kawk zui. A kut tuamna hi 'kraws' hmanga cheimawi a ni.

India international Edmund hi Best Player atan thlan a ni a, cheng nuai thum bakah Mahindra XUV a dawng dawn! Durand Cup final-ah hian Edmund bakah Lalchungnunga chuan East Bengal tan bul a ṭan ve bawk a, Bagan lamah Lalengmawia Ralte (Apuia) chuan bul a ṭan.

Lallianzuala'n tun nipui transfer-ah Bagan pan mah se, hliam vangin 100% a la ni lo a, final-ah pawh hian minute 73-naah a lut ve chauh.