November 30-ah Mohun Bagan lo zin dawn
India rama league ngaihven hlawh I League chu November 30-ah khelh ṭan a ni dawn a, match hmasa berah Aizawl FC chuan Mohun Bagan an mikhual ang.
November 30-ah vek Gokulam Kerala chuan Neroca FC an mikhual dawn bawk a, champion lai Chennai City FC chuan December 1-ah Manipur club Trau FC an mikhual dawn thung. I League boruak tinungtu Kolkata derby hmasa ber chu December 22-ah khelh a ni dawn a, season thar aṭanga Indian Super League khelh tum Mohun Bagan leh East Bengal an inkhel ang.
Dsport chu television lama I League pe chhuak tura ngaih an ni a, mahse he thu buatsaih a nih thleng hian AIFF lam chuan official-in an la puang lo. Hun rei tak chhung zan lam inkhel kalpui a nih loh hnuah zan dar 7:00 match awm leh turin AIFF chuan ruahmanna a siam a, chawhnu dar 2:00 leh tlai dar 5:00-ah a awm ṭhin bawk ang.
I League khel tur club tam zawkin an khelmualah floodlight an neih avangin tlai dar 5:00 leh zan dar 7:00 an chang nual a, RG Stadium-ah floodlight a awm loh avangin Aizawl FC chuan chawhnu dar 2:00-ah an home match an khelh vek a ngai dawn. Mizo club tih lohah Punjab FC chu chawhnu dar 2:00-a match khel vek tur an ni.
Manipur club Neroca FC leh Trau-te pawhin floodlight hnuaiah match an khel thei dawn a, tun hnai khan state sorkar chuan I League khelh tur avang hian an khelmual Khuman Lampak Main Stadium-ah floodlight dah hna an thawk a ni.
Indian football transfer kalphung tihdanglam a nih avangin club tinin an squad neih sa angin I League an hmachhawn a ṭul dawn a, Aizawl FC chuan an MPL squad hi an chhawm a ṭul dawn tihna a ni. Hetih rual hian club nei lo player chu lakluh theih reng an ni dawn a, January-ah thlasik transfer a inhawng dawn bawk.
Aizawl FC coach Stanley Rosario chuan, "Ka squad neihlai hi an ṭha tawk a, an kum la nau deuh mah se I League club dangah pawh khel tlak vek an ni," tiin Vanglaini a hrilh a, a hlauthawng lo. April thlenga khelh tur I League-ah hian club 11 an inlan dawn a, Aizawl FC bakah champion lai Chennai City, Churchill Brothers, East Bengal, Gokulam Kerala, Indian Arrows, Mohun Bagan, Neroca, Punjab FC, Real Kashmir leh Trau te an ni.
Minerva Punjab-in an hming an thlak avangin Punjab FC tih an ni tawh a, Trau hi second division champion niin I League-ah Manipur derby kan hmu thei dawn.