Hojbjerg-a'n Newcastle zawm duh lo

Newcastle United chuan Marseille aṭanga hi Pierre-Emile Hojbjerg lak luh an tumnaah club pahihte inrem mah se, amah Hojbjerg berin St. James Park pan a duh lo a, Marseille tan a khel chhunzawm dawn.

Tun nipuiah ringawt Sandro Tonali, Bruno Guimaraes leh Anthony Gordon te an chhak a, head coach Eddie Howe a chhuah bawk avangin Magpies boruak ṭhat lai ber a ni lo.

Midfielder pawimawh pahnihin an chhuahsan avangin a thlaktu tur an melh a, Tottenham Hotspur midfielder hlui Hojbjerg an duh ber. Mahse kum 31 mi Hojbjerg hi Marseille-ah a hlim a, Newcastle zawm a duh lo.

Magpies hi season hmasa khan 12-na nichungin season an khar a, an khelh ṭhat tawk loh avangin player ṭha an hip lo. Hojbjerg hma hian Johan Manzambi chu Aston Villa lakah an lo chân tawh.

Mahse Magpies hian player an hralhna aṭangin sum an ngah a, Danish midfielder hi la thei lo mah se sum tam zawk nen Borussia Dortmund midfielder Felix Nmecha chu an dawr dawn niin khawthlang chanchinbute chuan ziak.

Scottish Gas Murrayfield Stadium, Edinburgh-ah zanin dar 9:45 hian Newcastle United-in Everton nen friendly match an khel dawn a, manager thar Matthias Jaissle hnuaia an match hnihna tur a ni.