Fenerbahce leh Lukaku inhnaih

Belgium forward Romelu Lukaku Fenerbahce-in euro maktaduai rukin an dawr a, Napoli lamin thutlukna la siam lo mah se Lukaku hian Turkish League lamah a insawn hmel tawh hle niin Fabrizio Romano-a'n a tarlang.

Kum 33 mi Lukaku hian a vanglai a pel ve tawh a, ram tan inkhelh la chawlhsan lo mah se kumin World Cup pawh kha a tan a hnuhnung ber tur a nih a rinawm tawh.

Season hmasa khan hliam in a tlakbuak avangin a inkhel hnem tawh lo a, Napoli tan match nga inlanin goal khat chiah a khung. Napoli coach thar Massimiliano Allegri-a'n Lukaku hi a man phu tawka lei duh an awm a nih chuan hralh a pawi ti lo nia sawi a awm.

Hetiang boruak karah hian Fenerbahce an lo lang a, season hmasa Turkish Super Lig-a pahnihna hian champion nomawi chawi ngei an tum tawh avangin Lukaku lak an duh.

Yellow Canaries (Fenerbahce sawi) hian tun nipui transfer bazar-ah Mason Greenwood, Nathan Ake, Sidiki Cherif, Amara Diouf leh Vedat Muriqi te an lo la tawh a, €81.17 mtd lai an sen tawh avangin Belgian forward manah an buai a rinawm loh.

Kar hmasa lawk khan Mohamed Salah chuan Liverpool aṭangin Trabzonspor a zawm a, hei hian Turkis Super Lig boruak a chawk nung thar hle niin khawthlang chanchibuten an ziak a ni.