FIFA-in Ugarte hlawh an pe dawn

Kumin World Cup- khelh zawh taka hliam na tak tuar Manuel Ugarte chu FIFA-in a hlawh tam zawk an tumsak dawn a, hei hi FIFA-in dan an siam angin Ugarte hian ram tana a feh chhuahnaah ni 28 aia rei a inhliam vang a ni.

Kum 25 mi Ugarte hian group stage-a Spain nen an inhmachhawn ṭum khan a khup a tina a, zawn chhuah niin a lo kir hun tur a la hriat loh. A inhliam aṭanga ni 29-naah FIFA chuan Manchester United midfielder hlawh tam zawk chu an peksak dawn.

Uruguayan midfielder hian United-ah kar khatah pound 150,000 bawr vel a hlawh a, 80% chin chu FIFA Club Protection Programme kal tlangin FIFA hian an tumsak dawn a, Red Devils tan thawk huaina tham a ni ang.

He dan hi FIFA chuan 2012 khan a lo duang tawh a, club ten an player inhliam enkawl nana sum lama an phurrit lak kiansak an duh vang a ni. Mahse player te an dam leh hunah emaw, ni 365 a liam hnu emaw an khelhna club-a an contract a tawp chuan hlawh an peksak hi a tawp ve nghal dawn thung.

Ugarte hi season liam ta khan United tan a khel ṭha tawk lo a, inhliam lo chu ni se, Michael Carrick-a'n a hralh a rinawm zawk. Mahse hliam na tak a tawrh avangin 'risk' laa la lut duhtu an awm loh avangin Old Trafford-ah a châm hmel hle.