Rashford-a'n jersey no. 14 ha dawn

Manchester United forward Marcus Rashford-a'n season liam ta khan loan-in Barcelona a pan a, a jersey no. hak ṭhin 10 chu Matheus Cunha-a'n a ha tawh. Catalan club hian Rashy hi an la nghet lo a, Man United tan a khel leh dawn a, jersey no. 14 a ha dawn.

Rashford hian Man United tan a khelh hmasak ber khan jersey no. 39 a ha a, hemi hnu hian 19 leh 10 a ha tawh bawk. Barcelona tana a khelh khan English forward hian jersey no. 14 a ha a, hemi number hi Red Devils tan pawh a ha chhunzawm ang.

Man United tan Rashford hian Premier League match 287 khel tawhin goal 87 a khung a, club academy chhuak a nih bakah Manchester-a piang a nih avagnin lawm hlawh viau mah se manager chhuak ta Ruben Amorim nen an inhmuh thiam loh avangin season khat leh a chanve chhung chu loan hmangin a chhuak tawh.

Barcelona tana a che ṭhat avangin World Cup-ah England tan pawha koh a ni a, match hmasa bera Croatia an hmachhawn ṭumin goal a khung. Man United-ah Michael Carrick-a'n thuneihna a chelh a, Rashford-a'n club tana a khelh hmasak berah English manager nen hian an khelh dun avangin an boruak a ṭha a, hei vang hian Old Trafford aṭangin a chhuak ta loa ngaih a ni.

Zanin dar 12:00 hian Dublin-ah Manchester United-in Leeds United nen friendly match an khel dawn a, Rashford pawh squad-a awm tura ngaih a ni. PSG nena hliam vanga inlan lo Senne Lammens leh Matheus Cunha te pawh chhawr theih an ni dawn a, Benjamin Sesko pawh Dublin-ah a zin. Chutihrualin Sesko hi May thla tira Liverpool nen an inhmachhawn ṭuma a inhliam hnuah khelmualah a la inlan leh lo.