NBA-ah Wemby sang ber tawh dawn lo

San Antonio Spurs player Victor Wembanyama chu NBA-a sang ber a ni tawh dawn lo a, Los Angeles Lakers chuan feet 7 leh inches 5-a sang Jamarion Sharp-a chu two way contract hmangin an la lut a, Wemby aiin inches khatin a sang zawk.

Kum 24 mi Sharp hi kum 2024 khan NBA Draft-ah lang ve mah se college-ah a khelh ṭhat tawk loh avangin tumahin an team-a khel turin an thlang chhuak lo a, Draft-ah thlan ni lo mah se NBA hnuai chiah G League team Texas Legends a zawm.

Sharp hian 2024-25 season khan match 29 khelin, match khata point 6.4, rebound 7.2 leh block 3.2 nei ziah ang a ni a, a season hnihnaah che ṭha zualin point 8.9, 7.7 rebound leh block 4.4 a nei hialin, G League defensive player of the year chawimawina a dawng hial.

Defence lamah Sharp hi player ṭha bik a ni thei a, mahse NBA-a player langsar ni turin offence lamah hma a sawn a ngai dawn a, Clipper coach Tyronn Lue hnuaiah intuaihriam a tum ang.

Clipper hian player sang ber tur Sharp an lak rualin a hniam ber Yuki Kawamura an kawl tel dawn a, Japanese point guard hi Exhibit 10 contract hmangin an lalut bawk. Memphis Grizzlies leh Chicago Bulls tan pawha khel tawh Kawamura hi hi feet 5 leh inches 9 chauh a sang a ni thung.

Kum 25 mi Yuki hian Grizzlies leh Bulls tan NBA leh G League khel turin two way contract a lo ziak tawh a, Clippers tan kum khat khel tura inremna a neihpui avangin, Clippers hian NBA player sang ber leh hniam ber an kawl ve ve dawn a ni.