Liverpool-in Araujo an la lut

Transfer bazar-a an thawm a reh vang vang hnuah Liverpool-in chanchin lawmawm hriat tur an nei ve leh ta a, Barcelona aṭangin centre back Ronald Araujo chu season khat chhung an hnena loan-a khel turin an la lut.

Kum 27 mi defender hian kum 2018 khan Uruguayan club Boston River aṭangin Barca a zawm a, tunah chuan Anfield lamah a puanthuah a tel ve leh ta–Liverpool hian a ngheta lei theihna dan an ziak tel bawk.

Araujo chuan, "Club ṭha tak, sulhnu ropui tak nei Reds ka zawm thei hi ka lawm hle. Ka team mate-te hmuh ka châk tawh em em a, inkhelh hun ka nghakhlel hle a ni.

"Ka career-a club tha zawm hun tak niin ka hria a, club ka sawn hi a ṭul hlea hriatna ka nei a ni. Liverpool-in min duh tih ka hriat rual khan khaw dang ka hawi tawh lo a, engkim kha chak takin a kal a ni," a ti.

Araujo hi Barcelona captain hial ni thei mah se, Catalan club hian Gerard Martin leh Pau Cubarsi an neih avangin khelhna hmun a chang meuh lo a, season hman zawh takah khan league match 11-ah chiah bul a ṭan a, chona thar hmachhawn turin Liverpool a pan ta.

Uruguay international hian Barca tan match 213 khelhsakin, goal 14 a khung a, La Liga nomawi pathum a lakpui bakah, Copa del Rey (2) leh Supercopa de Espana (3) ah te a champion pui bawk.

Liverpool striker hlui Darwin Nunez chuan, "Liverpool fan-te thlawpna leh duhsakna awmzia i tem ve tur hi ka lawmpui takzet che. Fans ṭha tak an ni a, hlim takin an lo lawm dawn che a ni," a ti a, a ṭhianpa chu duhsakna a hlan.

Spanish football commentator Alvaro Romeo chuan, "Kum thum liam taa Barca-in La Liga nomawi an chawi kha chuan La Liga-a defender ṭha ber lawr lak a ni. Mahse, hliamin a tlakbuak a, ngai a awh leh ta lo.

"Concentration hloh chang a nei leh ṭhin. Mahse, kum thum liam taa a nihna ang kha a nei let thei a nih chuan Liverpool tan chuan rohlu tak a ni thei ang," tiin Araujo chu a fak.