Goal nga khungin Chhinga kaihhruai Chanmari an an chak

I Day Football champion lai Chanmari FC-in team ṭha bik an nihzia nemnghetin nimin khan MPL kaithar Ramthar Veng FC chu 5-0 in an sawp. Coach Rochhingpuia hoten semifinal an lut a, an hmelma Aizawl FC nen final khel tur an zawng dawn. August 13, Ningani chawhnu dar 2:00 hian RG Stadium-ah an inhmachhawn dawn a, final ai pawha en châkawm zawk tur a ni.

Chanmari FC hian match hmasa bera Dinthar FC an hneh loh hnuah an insiamrem tawh a, Ramthar Veng lakah pawh an chungnung. I Day Football leh MPL champion lai Chanmari hian ṭan phat aṭangin goal chance pawh an insiam hnem a, forward TZ-a'n goalkeeper chauh a hmachhawn hnuah khung lo mah se minute 30-naah mawi zetin a tauh lut.

Chanmarians wing back HK Lalhruaitluanga'n crossbar a pet per a, first half-ah goal a luh belh tawh lo. Ramthar Veng pawhin chance nei ve bawk mah se keeper Zothanmawia tan hna harsa an siam thei lo. Second half-ah Freddy Lalrinkima a rawn lut a, season liam taa MLS FC-a hming chher Tanhril tlangval cross chu Ramthar Veng defender Eddie Lalhmangaihzuala'n an lamah minute 61-naah a tilut.

Chanmari an che ṭha chhunzawm a, Joel Lalramengmawia'n goal ropui bik a khung a, yard 30 vel daih aṭangin minute 64-naah kawh zetin a pet lut. Ramthar Veng keeper Joel B. Ramchhana dem theih a ni lo a, Khamrang tlangval hian a pet ṭha ve hrim hrim. Chanmari midfielder Joel hian penalty aṭangin minute 76-naah a khung belh a, Chanmari tlangval Malsawmkima penalty hlawhchhuah a ni.

MPL kai thar Ramthar Veng tan Chanmari an ṭha hret a, tun inelnaa squad neih chhah ber Chanmarians tan Freddy-a'n minute 89-naah cool zetin Chanmari goal ngana a khung. IFL club Chanmari hian 5-0 in an hnehna an chang a, semifinal-a 4-0 a chak Aizawl FC nen an inhmachhawn dawn.