Inkhel hmuhnawmah Hunthar vannei

LBS Suzuki Avenis 24th Inter Branch YMA Volleyball Tournament 2026-ah Huntharin nimin tlai khan Nursery 3-2 a hnehin final an lut. Huntharin inelna hnuhnung pathumah final an lut vek a, August 13, Ningani zan dar 8:00 hian Khawbel nen nomawi an inchuh ang.

R. Dengṭhuama Stadium, Mualpuiah Huntharin bul an ṭan ṭha a; vice captain Lalruatfela Sailo, Laldampuia leh Lalmama te hmangin 25-16 in set an la. Hunthar tan hna awlsam dawnin lang mah se set hnihnaah erawh Nursery an rawn tho.

Nursery hian point hmu nghal pawp pawp mah se a tawp lamah an chesual a, awlsam takin set an la lo. Chutihrualin Vavala leh setter Noel Laltlansanga thluak ṭhatna hmangin 25-23 in an la ta tho.

Final luh beseina sang lehzual turin Nursery-in set thumna pawh an la a, 25-16 ngawta an chak avangin chak turin an dinhmun a ṭha hle. Mahse, pressure sangah player nei ṭha Hunthar an rawn inlar a, Dampuia a chet ṭhat zarah set lina 25-21 a lain, 2-2 a ni chiah.

Deciding set khelh a ngai a, set tawpna berah Huntharin bul an ṭan fuh avangin harsatna lutuk an tawk ta lo. Dampuia'n chakna point nalh takin a vaw thla a, Huntharin set ngana 15-12 a lain, straight set-in an chak.