Aizawl FC tan Khawbel tlangval Zomuana

I Day Football Tournament 2026-ah Aizawl FC-in nimin khan Khawbel tlangval Zomuansanga hattrick hmangin Saikhamakawn 4-0 in an sawp a, semifinal an lut. Coach R. Lalruatfela hote tan Zomuana'n hattrick a siam hma hian Vincent Lalduhawma'n goal hmahruai a khung.

Aizawl FC hian tun hnaiah tualchhung football thunun viau mah se knockout inelna ngaihhlut I Day Football-a an champion hnuhnun ber chu kum 2016 daih tawh kha a ni. Hei vang hian coach R-a hote hian kumin I Day Football hi an la thutak hle.

Goal hnih phawt

Saikhamakawn hian tun season H. Lalrindika an la lut a, tawnhriat nei ṭha winger Lalrokima an lalut a, midfield-ah Dawngkima leh Joseph Lalṭhafela te an neih bakah SYS goalkeeper Bawihpuia te an la lut. SKK player neih dan thlirin Aizawl FC tana buaina siam thei tur an ni.

Mahse, Aizawl FC lamin coach R. Lalruatfela an nei a, SKK-in an chhaih buai pha lo. Minute 17-na lekah Vincent-a'n box chhung chiah aṭangin a hlai lut a, goal mawi bik a ni. Coach R-a hoten passing game an khel a, ball an chang tam a, inkhel an thunun hle.

Minute 45-naah MPL season khata goal khung tam ber record siamtu Zomuana a rawn inlar a, vei lam aṭanga Sawma Tlangte thawhrah chu Khawbel tlangval hian goal-ah a chantir. First half-ah 2-0 a ni.

Goal hnih dang

Saikhamakawnin second half ṭantirhah bul rawn ṭan ṭha mah se minute 50-na lekah Zomuana hmangin Aizawl FC-in an khung belh. Fela Hlawndo ball pek luh ṭha chu Zomuana'n angle zim tak aṭangin a khung a, 3-0 a nih tak avangin R-a hote nuam sa zawkin an khelh theih phah.

Aizawl FC-in goalkeeper-ah ke pahnih hmang thei RS Lallawmzuala an lalut a, CYMA Football best goalkeeper hian hnung lam aṭanga ball a sem theih bawk avangin inkhel an thunun kawngah a ṭangkai hle.

Minute 69-naah Aizawl FC-in tlarhnung aṭanga ball rawn inpe chhuakin mual laiah Zomuana leh Laltlanzova (Zozoa) te wall pass hmangin SKK tlarhnung an ṭhiat a, Khawbel tlangval hian kawh zeta pet lutin hattrick a siam.

Khawbel tlangval Zomuana a hmuhnawm a, team angin Aizawl FC an hmuhnawm a, Saikhamakawn lakah inkhel thunun chungin 4-0 in an chak. Coach Rindika tan erawh tun ṭuma an chak lohna hi Mizoram Premier League atana zirlai ṭha tak a ni thei ang a, MPL-a che ṭha tur chuan indawm kun lo a, an thawhrim chhunzawm a ṭul ang.