Hmeichhe Volleyball: Vawiinah semifinal khel dawn

LBS Suzuki Avenis 24th Inter Branch YMA Volleyball Tournament 2026, hmeichhe inkhel chu vawiinah semifinal khelh a ni tawh dawn a, chawhma dar 10:00 hian R. Dengṭhuama Stadium-ah Bungkawn leh Dinthar ten match hmasa ber an khel ang.

August 8, Inrinni khan quarterfinal khelh a ni a, Bungkawn leh Dinthar bakah Luangmual ten semifinal an lut. Inkhel hnuhnung zawkah Luangmual leh Dawrpui Vengthar ten final khel tur an zawng ang.

Bungkawn vs Dinthar

Hmeichhe volleyball-a sulhnu nei ṭha ber leh champion lai Bungkawn chuan Dinthar an hmachhawn dawn a, coach Lalruatsanga Sailo hoa khel tur Bungkawn hi kuminah pawh champion tura rinkai zinga mi an ni.

Hetihlai hian an hmachhawn tur Dinthar an zam bik lo a, an coach PC Lalhriatpuia chuan, "Player-ah chuan tawnhriat nei tlem zawk kan ni a, mahse kan khelh tawh dan thlir letin Bungkawn ka huphurh bik lo. Khel thei lo tur an awm dawn lo a, inrintawkna kan neih ṭhat avangin kan hneh theih kan inbeisei," tiin Vanglaini a hrilh.

Luangmual vs DPVT

Inkhelh hnuhnung zawkah Luangmual leh Dawrpui Vengthar an intawng dawn a, a vawi khat nana champion tum Luangmual an phur tawh hle. An coach K. Lalawmpuia chuan, "Kan player te an dam kim a, kan boruak ṭhat lai a nih avangin kan phur hle. Dawrpui Vengthar player te hi kan hriat chian tawh sa an ni a, kan defence a khawng ṭhat chuan kan tlang theih kan inring," tiin Vanglaini a hrilh.

Dawrpui Vengthar an zam dawn bik lo a, semifinal lut hmasa ber an nih avangin inbuatsaihna hun an ngah bakah vawi thum champion tawh an nih avangin an inringtawk dawn. Chutihrualin an champion hnuhnun ber hi 2007 daih tawh a ni a, kum 18 hnuah champion tumin kawng dik an zawh mek.

DPVT hian kum 56 mi Lalropuii an nei a, a kum tam ve deuh tawh mah se a team tan player pawimawh a ni a, Vaivakawn nen an inhmachhawn ṭum khan 'Player of the Match'-ah thlan a ni nghe nghe.