Chawhnu dar 2-ah Ramthar Veng vs Chanmari

I Day Football quarterfinal-ah champion lai Chanmari FC-in vawiin chawhnu dar 2:00 hian MPL kai thar Ramthar Veng an hmachhawn dawn. Ramthar Veng hian Kanan FC hnehin an group-ah pakhatna ni mah se knockout stage-a champion lai Chanmari an chang hi an vanduai hle.

Ramthar hian coach atan HC Zarzoliana an lalut a, Ramhlun South player ṭha an suan lut nual bawk. Group stage-ah Lalawmpuia, Lalrinchhana leh Lalremruata te chu tlarhma lama an innghahna an ni a, mah se Chanmari tlarhnung su pawp tur chuan an khelh ṭhat ni an tawn a ṭul dawn.

Coach Rochhingpuia kaihhruai Chanmari hi an player neih dan thlirin I Day Football bika team ṭha ber an ni a, Dinthar lakah bul ṭan sual deuh mah se Bawngkawn lakah 5-0 a chakin an insiamṭha leh tawh hle. Chanmarians hian an player neih sa ringawt pawhin inelna hmachhawn se, champion nawn thei tur an ni a, ISL player ṭha an neih lehzel avangin Ramthar laka chak turin an buk a rit hle. Coach Zara kaihhruai Ramthar Veng tan tlarhnung thuam chak a pawimawh ang.