R-a 'Aizawl FC' vs Rindika 'Saikhamakawn'

I Day Football quarterfinal-ah vawiin chawhma dar 11:00 hian coach R. Lalruatfela enkawl Aizawl FC leh coach Lalrindika Hmar enkawl Saikhamakawn te an inkhel dawn. Aizawl FC hian kumin I Day Football hi an la thutak a, champion ngei an tum a, an khingpui tur Saikhamakawn hi nikum finalist an ni.

Aizawl FC hian tun ṭum inelna bul an ṭan ṭha tawk lo a, MLS lakah point khat an hlawh chhuak hram. Mahse, coach R-a hote hi rang takin an siam ṭha a, Lushai Corner FA lakah 3-0 in an chak. IFL club hian First Division club an hmachhawn ṭum hian game mawi an khel a, an goal bawh a na viau bawk.

AFC tan Vincent Lalduhawma, Lalrinhlua leh Vanlalramnghaka ten Lushai Corner lakah goal khat ṭheuh an khung a, MLS nen 2-2 a an inhnehtawk ṭumin Zomuansanga leh Rohmingthanga ten goal khat ve ve an khung bawk. R-a hote zingah goal khat aia tam khung an la awm a, chutihrualin Saikhamakawn tan Khawbel tlangval Zomuana ven uluk a ṭul ang.

Saikhamakawn hian coach Lalsangzuala Hmar hoa season khat an khelh hnuah Rindika an lalut a, SKK hi an khelh chinah hriatthiam an la har hle. Rindika hote hian hneh loh an la tawng lo a, group stage-ah Mizoram Police nen an point hmuh leh goal difference bakah an goal khung zat thleng a inan avangin ṭhum an vawr a ṭul phah. SKK hi an vanduai ta zawk a, group C pakhatna Aizawl FC an hmachhawn a ṭul phah.

Vawiin hi Saikhamakawn dinhmun fiahna tur a nih ang chiahin Aizawl FC dinhmun hriatna tur a ni thei ang. SKK leh AFC te hian tun ṭum inelnaah MPL club hneh an la nei lo ve ve a, Aizawl FC hi buk rit hret mah se Rindika hote hi dah hniam a thiang lo.