Sum vang a ni lo - Jamshedpur FC

Indian football buai tak karah Jamshedpur FC-in ISL an khelh loh tur thu an puang a, Indian football-a club ngelnghet ber ang hiala chhal theih ni chungin an tawp thut!

Tam takin AIFF an dem a, ṭhenkhatin Indian football-a sum hloh tam lutuk vang a nih thu an sawi a, Kolkata khawpuia Brazil inkhel tur thlengin ṭhenkhat chuan an sawi hnawm.

Mahse, Jamshedpur neitu, Tata Steel vice president (Corporate Services) D B Sundara Ramam chuan, "Kan thutlukna hi tun hnai maia siam kan ni lo a, tun hnai thil thlengte nen inkungkaihna engmah a nei lo," a ti.

Tata hotupa chuan, "ISL hi a hmaa inremna awm sa ang khan kal reng pawh ni se, kan thutlukna hi chu a ngai tho tho ang. Commercial lama ISL dinhmun chian loh vanga he thutlukna hi siam kan ni lo.

"Kan hmalaknate kan thlir letin, kan chakna leh ṭhatna ber lamah insawrbing a fuh zawkin kan hria a, chutianga hma la chu kan ni - kan chakna ber chu grassroots football a ni," a ti a, player naupang chher lamah rilru an pek tur thu a sawi.

Tata Steel hian Indian football-a academy lar bera chhal ngam Tata Football Academy an nei ṭhin a, TFA aṭang hian player 275 vel zet chherchhuak tawhin, 150 ngawtin ram tan an khel a, heng zinga 26 chuan age level hrang hrangah India tan captain armband an hreng bawk.

TFA tia hriat lar academy hi Mizoram football tan pawh a hlu hle - Mizo zinga professional footballer hmasa ber S. Malsawmtluanga pawh TFA chhuak niin, Jerry Zirsanga, Vanlalrova, Malsawma, Robert Lalthlamuana leh PC Lalawmpuia (Tuaitea) te pawh TFA chhuak vek an ni.