Terina'n goal a khung nghal - Jamshedpur a vel!
Mizo midfielder ṭha Lalrinliana Hnamte (Terina) chuan Sporting Club Delhi tana a match hmasa berah goal hnih a khung nghal a, Jamshedpur FC lakah a team chu 2-1 in hnehna a chanpui.
Asia khawmualpuia tournament upa ber Durand Cup chu khelh chhunzawm zel a ni a, Thawhlehni khan match hnih khelh a ni a, match dang zawng aiin ngaihven a hlawh bik - a chhan chu Jamshedpur FC an inkhelh vang a ni.
JFC hian season tharah ISL an khelh loh tur thu an puang a, hei hian Indian football chu na takin a nghawng. Thawhlehni zana an inkhel hi JFC tihtawp a nih tur thu an sawi hnua an match hmasa ber a ni a, 2-1 in an tlawm zui.
Thawhlehni zan inkhel hnuhnung zawkah Mohun Bagan-in chak turin harsatna an tawk lo a, South United FC chu 8-0 ngawtin an sawp bawk - group stage a la ni bawk a, goal a lut tam ṭhin hle.
A hming Terina
Dungtlang/Chanmari tlangval Lalrinliana Hnamte-in season hnih a khelh tawhna Chennaiyin chhuahsanin, Sporting Club Delhi a zawm a, SC Delhi tana a match hmasa berah goal hnih a khung nghal!
Jamshedpur hian minute 22-naah Mohammed Sanan hmangin goal hmahruai an khung a, Men of Steel an phur hle. Mahse, SC Delhi tan Lalrinliana Hnamte (Terina) a inlar a, goal hnih a khung.
SC Delhi tana Mohammed Aimen-a shot chu Aizawl FC keeper hlui Albino Gomes chuan dang perin, a per lehlam hi Terina'n goal-ah a chantir a, minute 51-naah si phurh sutna goal a khung.
Mizo midfielder hian a la duhtawk mai lo - minute nga hnuah a inlar leh a, Augustine Lalrochana ball siamsak duhthusam chu goal-ah a chantir leh a, SC Delhi tan a match hmasa berah goal hnih khungin, 2-1 in hnehna a chanpui.
Duhaisam
India tan pawha lo inlan tawh Terina'n midfielder ni chungin, a club thar tana a match hmasa berah goal hnih a khung nghal a, Men of Steel lakah a team chu hnehna a chanpui nghal.
Terina chuan, "Duhthusam a ni e. Hei lo liama bul ṭan dan duhawm a awm chuang lo - goal khung kha ka inbeisei lo reng reng," tiin Vanglaini a hrilh a, a tan 'dream debut' a nih thu a sawi.
Chanmari FC aṭanga inzir chhuak Terina hian East Bengal, Mohun Bagan leh Chennaiyin tan a lo khel tawh bawk a, ISL nomawi thlengin a lo chawi tawh - a kum la nau viau mah se, tawnhriat a nei ṭha hle.
SC Delhi tan hian Terina bakah Augustine-a'n inkhel bul a ṭan a, Jamshedpur lamah C. Lalhriatpuia chuan inkhel bul ṭanin, Lawmsangzuala chu bench aṭangin a lut bawk.
Jamshedpur an ngen
Thawhlehni zana inkhel hi Jamshedpur-in ISL an khelh chhunzawm loh tur thu an sawi hnua an match hmasa ber a ni a, Birsa Munda Stadium, Ranchi-ah ruah sur mah se, fans sing tel an pungkhawm a, JFC titawp lo turin thuneitute an ngen.
Jamshedpur hi ISL-a entu nei ṭha ber pawl an ni reng a, an khelmual JRD Tata Sports Complex-ah fans 20,000 chuangin inkhel an en deuh reng. Mahse, heti chung hian tihtawp a ni ta tho.
JFC ṭantu fan-te hian, "TATA hmingṭhatna hum hram rawh u, Jamshedpur FC, Indian football-in a mamawh lai takin TATA a tlawm ta," tih te, "ISL-ah Jamshedpur a lo kir kan beisei," tih te leh, "Fan-te au thawm hi ngaithla rawh u," tihte chu an banner ken zingah a tel.
Men of Steel hi titawp mai lo turin Indian footballer langsar tam takin ngenna an siam bawk a, mahse, tun dinhmuna a lan dan chuan JFC hian an thutlukna an sut hmel loh hle.