Neeraj Chopra-a'n gold hlawh chhuak zo lo

Commonwealth Games neih mekah India javelin thrower chhuanvawr Neeraj Chopra chu, Zirtawpni zan khan intihsiakin gold medal a hlawh chhuak zo lo a, Sri Lanka aiawha tel Rumesh Tharanga Pathirage chu tluk loin silver medal a la.

Kum 28 mi Neeraj hian meter 85.83 zeta thui a khawh thleng a, mahse Pathirage-a'n meter 89.75 a khawh chu a khum zo lo a, metre 3.92 chauhin a a tluk lo. Neeraj bakah hian India tan Yashvir Singh chu tel vein pathumna a ni a, metre 85.41 khawh thlengin bronze medal a hlawh chhuak.

Olympic pawh lo champion tawh Neeraj chuan, "Ka hriselna leh fitness hi a hma angin a ṭha tawk lo a, June thla Diamond League, Doha-a neih kha inhliam hnuah ka inelna hmasa ber a ni a, khami ṭum pawh khan ka la inpeih lo hle. Tunah chuan a hma aiin tlemin ka ṭha tawh zawk a, mahse a hma ang kha chu ka la phâk chuang lo.

Gold medal lak chungchangah ka tan pressure a awm hran lo a, ka tan chuan 100% a fit ṭhat hi a pawimawh ber. Chu chu kan nei thei a nih chuan engkim ti thei tur khawpin kan bei thei ṭhin.

Mahse hliam damkawr nih chuan kawng engkimah fimkhur a ngai ṭhin. Vawiinah pawh khan ka fimkhur hle a, a chang chuan theihtawp chhuah a na taka khawh mai kha ka duh a, mahse ka hliamte ka ngahtuahin ka inthunun leh thei hram. Chutichung pawh chuan ka khawh ṭha thawkhat viauin ka hria," a ti.

Neeraj chuan a fei khawh chungchang sawi chhunzawmin, "Vawiinah kha chuan vawi khat chiah khawh ṭhat ka neiin ka hria, a dang ho kha chu khawh ṭha angin inhre mah ila a fei (javelin) kha a thlawk ṭha thei lo. Boruak vawt hnuaiah hian ka ti ṭha thei ṭhin lo. Khaw lumah hian ka che ṭha ṭhin zawk, Indian ka nih vang te pawh a niang," tiin a fiamthu zui.

Haryana tlangval hian August 21, Zirtawpni hian Switzerland-ah Lausanne Diamond League a khel leh nghal dawn a, he inelnaah atan hian inbuatsaihna a nei leh vat dawn a, chawlh a nei rei dawn lo hle.