Curry-a'n Warriors chhuahsan dawn em?

Golden State Warriors legend-a chhal ngam Stephen Curry chu tun hnaiah a chhuak dawn nia sawi a awm a, Boston Celtics-in Jaylen Brown thlakna turin an duh niin khawthlang chanchinbuten an ziak.

Thla hmasa khan Brown-a'n Philadelphia 76ers a zawm a, Celtics-in Brown aiah Paul George an chang ve thung. Celtics hian kum 36 mi George nei mah se an la duhtawk lo a, Brown a awm loh bakah Jayson Tatum chu hliam damkawr a nih avangin team khaipa ni turin Curry an duh.

Kum 38 mi Curry hian NBA a khelh tirh aṭangin Warriors-ah chauh a la awm a, kum 17 a châm chhungin NBA title vawi li a lakpui tawh bawk. NBA chanchina shooter ṭha ber zingah a hming a nem kai.

A kum tam ve deuh tawh mah se Curry point guard ṭha ber berte zing mi a la ni reng a, season liam ta khan match tinah point 26.6, rebound 3.6 leh assist 4.7 nei ziah ang a ni a, field goal 46.8% leh three points 39.3% a vawm lut bawk.

American point guard hi mimal takin che ṭha mah se a teammate ten an pui ṭha tawk lo a, ACL hliam vanga Jimmy Butler an chân hnuah beisei an pha lo leh zual. Season hmasa khan Western Conference-ah 10-na an ni pha ṭawk a, play-in tournament-ah Phoenix Suns hneh loin an tla zui.

Warriors an tlahniam ve telh telh a, player thar an la emaw a awm saten hma an sawn thut a nih loh chuan season tharah pawh nomawi beisei ngam chi an ni lo. Hetiang a nih chuan Curry tan pawh chhuak turin thutlukna siam a awl sawt ang.