Barca-in Birmingham hneh lo

Spanish champion Barcelona chuan Zirtawp zan khan pre season-ah Championship Division club, Birmingham City chu 2-2 a an inhnehtawkpuiin penalty shootout-ah 3-2 in a tlawm zawkah an ṭang.

Barca tan kum 18 mi Hamza Abdelkarim-a'n goal hnih khung mah se, Birmingham tan August Priske Flyger leh Jhon Solis ten an khung ve bawk.

Barca an tlawm

St. Andrew's Knighthead Park, Birmingham-a inkhelah mualneitu team tan, August Priske Flyger-a'n minute 31-naah an hmahruaina goal a tauh lut a, Barca tan Abdelkarim-a'n first half tawp hma hretin penalty hmangin a sut.

Second half-ah Barca-in goal an khung hmasa ve thung a, Abdelkarim-a'n a hmawr bawkin an hmahruaina goal a khung. Egyptian rawlthar hi World Cup-ah khan an ram tan match li a khel ve a, goal erawh a khung lo. Season tharah en bik a sual lo ang.

La Liga champion lai hi phur viau mah se minute riat hnu lawkah Solis-a'n a an siphurh a sut ve leh nghal a, hun tawp thlenga goal a luh tawh loh a, extra time khelh loin penalty hmangin chak zawk an zawng.

Penalty shootout-ah Catalan club tan Roony Bardghji, Jordi Pesquer, leh Brian Fariñas ten an hlah a, Birmingham tan Jack Robinson leh Luis Vasquez ten hlah mah se midangin an pet goal vek avangin an chak ta tho.

Birmingham chak lai hi an player hlui Jude Bellingham chuan a hmunah a en a, mipuiin standing ovation an pe hial. English midfielder hian a chawr chhuahna a la theihnghilh lo tih lantirin a club hlui chak lai hi a tawp thlengin a en.

Engtin zel?

Hansi Flick-a naute zingah World Cup khelh avangin Lamine Yamal, Pedri, Gavi, Dani Olmo, Ferran Torres, Pau Cubarsi, Eric Garcia, leh Joan Garcia te an la chawl a, Birmingham hmachhawn squad-ah an tel lo.

Catalan club senior player zingah Wojciech Szczęsny, Andreas Christensen, Gerard Martín, Marc Bernal leh Marc Casadó te chauhin bul an ṭan a, Borussia Dortmund aṭanga an lak luh Karim Adeyemi chu a vawi khat nan a inlan bawk.

Barca hi chak lo mah se lawmna tur an nei tho a, season tawpa hliam vanga World Cup khel thei lo Fermin Lopez chu bench aṭangin a inlan leh thei tawh. Spanish midfielder hian season liam ta kha match 45 khelin goal 13 leh assist 16 zet a nei thei a, season tharah pawh player pawimawh a ni leh ang.

August 8, Inrinni zanah Barca hian Nottingham Forest an hmachhawn leh nghal dawn a, Birmingham an hneh tawh loh avangin friendly match ni mah se chak loh nawn a duh tawh lo ang.