Maresca hi City tan a ṭha ber - Gvardiol

Manchester City defender Josko Gvardiol chuan an manager thar Enzo Maresca chu club tan a ṭha ber a, Pep Guardiola hnuaia thawk ṭhin a nih avangin amah thlak turin ani aia ṭha an awm bik loh thu a sawi.

Kum 24 mi Gvardiol chuan, "Maresca hian thiamna sang tak a nei a, thil thar tam tak a rawn keng tel a, a hnuaiah kan inkhelh zel dan tur hriat a châkawm tawh. Ani hi tun dinhmunah chuan a ṭha ber a, mahse hun a mamawh dawn. Manager tan club thar enkawl hi thil awlsam a nih loh avangin kan dawhtheih a ngai.

Keini pawhin theihtawp kan chhuah a ngai a, a duh dan taka kan khelh chhuah vat theihna turin kan ṭan a ngai dawn. City hi Europe-a club lian ber zinga mi a ni a, chuvang chuan club ropui enkawl tura an rawih a nih avangin a ṭha tih a chiang," tiin an boss thar tur a ringtawk hle.

Kum 46 mi Maresca hian kumin January khan inhriatthiam tawnnain Chelsea a chhuahsan a, thla tam pawh a liam hmain an elpui City chuan Pep thlak turin an ruai leh nghal. Maresca hi 2022-23 seaon a City treble champion an nih kum khan Pep-a assistant a hna a lo thawk tawh.

City hian Inrinni zan khan Hong Kong-ah Inter Milan nen friendly match an khel a, hun pangngaiah 1-1 a an in draw hnuah Man City hi penalty-ah 3-1 in an vanduai zawk. Club pahnihten player langsar an chhawr hnem dun a, Citizens tan Divin Mubama-a'n goal a khung a, Inter tan Benjamin Pavard-a'n a khung ve bawk.

August 5, Nilaini tlai dar 4:30-ah City hi K League All Stars nen an inkhel leh nghal dawn a, Seoul World Cup Stadium-a khel tur an nih avangin South Korea lam panin an thlawk chhuak a, hahdamna hun an nei tlem hle.