Reliance Academy tan Kanan ṭha hret

Kanan FC-in I Day Football-a an match hmasa berah Ramthar Veng hneh lo mah se coach C. Zothantluanga (Apuia) hote hian group match hnuhnung berah Reliance Foundation Young Champs (RFYC) academy chu 3-0 in an sawp. Kanan hian quarterfinal an lut a, August 10, Thawhṭanni chawhma dar 11:00-ah Dinthar FC nen an hmachhawn ang.

MPL club Kanan hian an veng tlangval Freddy Lallawmawma chu I Day Football-ah an chhawr a, Kerala Blasters midfielder hi player pawimawh a ni. Sialhawk tlangval Crespo Vanlalhriatpuia'n ṭha zeta a lakluh hnuah minute 35-naah Kanan goal hmahruai a khung.

RYFC an la patuai hret a, fimkhur an la hre tawk lo. Minute 54-naah Lalthlanawma'n box chhungah RYFC player ball chhuhsakin a ball pek ṭha zet chu David Lalchhuanawma'n a khung.

Goal hnihna khungtu David hi goal thumna siamtuah a ṭang a, minute 66-naah Malsawmzela'n (Valpuia) chak nemnghehna goal a khung. Kananin 3-0 in hnehna an chang a, Dinthar FC hmachhawn hun an nghakhlel khawp ang.