Prof Sawma'n CYMA Volleyball a beng hawng

LBS Suzuki Avenis 24th Inter Branch YMA Volleyball Tournament 2026 Ben Hawnna chu Zirtawpni zan khan Central YMA Hall, Tuikhuahtlangah neih a ni a, CYMA general secretary Prof. Malsawmliana'n ben hawnna hi a nei a ni.

CYMA general secretary Prof. Malsawmliana chuan, "Volleyball inkhawmpui kan nei leh dawn a, Mizoram Volleyball Association nen hun rei tak chhung ṭha taka kan thawk ho thei zel hi a lawmawm a, Pathian hruaina a ni. Inelna buatsaihna tura tha thawhtu CYMA hnuaia Sports Sub Committee leh MVA te inpekna a ropui ka ti hle.

"CYMA hian sports association hrang hrang nen thawk hoin inelna hrang hrang kan buatsaih a, hei hi kan Mizo ṭhalaite tan hian a pawimawh khawp mai. An talent hai chhuaktu a nih bakah sports lama an ei zawnna kawngka hawngtu a ni bawk," tiin a sawi a, inelna hmachhawntute chu inkaihhruaina dan zawm ṭheuh turin a ngen bawk.

Tun ṭum inelnaah hian mipa leh hmeichhe inelna a awm dawn a, mipa team 57 leh hmeichhe team 19 an tel dawn. Ben hawnna neih zan hian MVA president Dr Lalmalsawma Nghaka'n fixtures a tlangzarh.

CYMA Volleyball hi August 4-15, 2026 chhung hian R. Dengṭhuama Hall-ah khelh a ni ang. Inelna hnuhnung ber hi kum 2024 khan neih a ni a, mipa inelna Muana Veng chuan final-ah Hunthar chu straight set (25-19, 29-27, 25-21) a hnehin an champion. Hmeichhe inelnaah Bungkawnin Vaivakawn chu straight set (25-17, 25-23, 25-2) thoin an hneh ve bawk.