Game mawi kheltu Aizawl FC an chak

I Day Football-ah coach R. Lalruatfela kaihhruai Aizawl FC-in game mawi an khel a, goal mawi khungin Lushai Corner 3-0 in an hneh. IFL club AFC hian goal thuma an chak avangin group C-ah pakhatnaah an awm a, an hnuai awm MLS FC nen quarterfinal an lut.

Aizawl FC hian match hnuhnung berah draw pawhin quarterfinal an lut thei tih hre mah se group hmahruaitu nih ngei an tum a, Lushai Corner-in I Day Football atana an lakluh Sairuatkima an chhawr theih loh avangin coach B. Malsawmzuala tan pawh tlarhnung tihphui a harsa.

Coach R-a'n CYMA 2025 best goalkeeper RS Lallawmzuala bul a ṭantir a, Aizawl FC-in passing game an khelh theih nan ke pahnih hmang thiam RS-a ṭangkai hle. Minute 18-na lekah Vincent Lalduhawma'n Aizawl FC tan goal hmahruai a khung a, team goal ṭha bik a ni.

IFL club hian goal hmahruai khung tur hian tlarhnung aṭangin ball an in pass chhuak a, Lushai Corner tlarhnung an ṭhiat nalh hle. Goal hnihna erawh mimal tih ṭhat a ni a, Lalrinhlua'n mawi zetin box pawn aṭangin a volley lut.

Aizawl FC-in inkhel an thunun a, minute 78-naah substitute Vanlalramnghaka'n chak nemnghehna goal a khung. Zomuansanga'n goal khung lo mah se Khawbel tlangval hi tlarhmaah a hriam a, Ramnghaka goal khung pawh hi a siamsak a ni.