I Day Football quarterfinal-ah MPL club pariat

Tualchhung football season ṭan hmaa khelh ṭhin I Day Football 2026 group stage chu khelh zawh a ni ta a, MPL13 khel tur club pariatten quarterfinal an lut vek. MFA buatsaih inelnaah hian MPL club pariat bakah Aizawl DFA First Division club leh state pawn team pahnih ve ve an tel bawk.

I Day Football hian MPL boruak a tingaihnawm sawt a, ADFA First Division club chauh ni loin state pawn team laka an chungnunna pholanin a awm. First Division club pahnih Bawngkawn FC leh Lushai Corner FA bakah state pawn team Manipur club Ganggam SC leh Mumbai-a innghat RFYC ten an point an hmu lo. Club palite hian MPL club vawi hnih ṭheuh an hmachhawn a, an chak lo vek.

Group stage-ah an ruh no thliar hranin an awm a, quarterfinal-ah team ṭha pariat Dinthar FC, Kanan FC, Mizoram Police FC, MLS FC, Aizawl FC, Saikhamakawn, Ramthar Veng FC leh Chanmari FC te chauh an dam tawh. IFL club pahnih Aizawl FC leh Chanmari FC te hi club dang laka chungnung hret tura ngaih an ni a, mah se group stage aṭanga thlir chuan an ṭha fal bik lo.

Aizawl FC-in MLS FC an chelh hram a, Lushai Corner an sawp zarah an group-ah pakhatna an ni. Chanmari FC erawhin Zo Clasico-ah Dinthar FC an hneh lo a, pahnihna nichungin quarterfinal a lut. Hei hian nghawng lian tak a nei a, final-ah IFL club pahnih an inhmachhawn thei dawn lo a, quarterfinal-ah an chak ve ve a nih pawhin semifinal-ah an inhmachhawn ang.

I Day Football 2024 champion Mizoram Police leh nikum finalist Saikhamakawn te pawh kawng engkimah an intluk a, ṭhumvawra a ngaih phah hial. Inrinni khan ṭhumvawr neih a ni a, Police an vannei ta zawk. Police hian quartefinal-ah MLS FC an hmachhawn thei dawn a, SKK erawh semifinal lut turin Aizawl FC an paltlang an ngai dawn.

Quarterfinal a hmuhnawm dawn a, Aizawl West Derby hmuh tur a awm dawn. Dinthar FC leh Kanan FC inkhel tur hi boruak a ṭan ṭhat viau a rinawm a, MPL kaithar Ramthar Veng pawhin Chanmari FC lakah fiahna an hmachhawn ang. MPL club-te hian inbuatsaihna hun ṭha an nei dawn a, quartefinal hi August 10, Thawhṭanniah khelh a ni chauh ang.