Man United-in Atletico an hneh

Manchester United chuan Inrinni zan friendly match-ah Atletico Madrid an hmachhawn a, Michael Carrick-a hote hian 2-1 in an lehthal. Atletico hian minute ngana lekah Arnau Ortiz hmangin goal hmahruai khung mah se English club hian second half-ah Bryan Mbeumo goal hnih hmangin an chhanglet.

Man United hian tun season atana friendly match hmasa berah Wrexham 1-0 in hneh lo mah se Rosenborg 5-0 in an sawp a, Diego Simeone hote an hneh leh bawk. Friendly match chauh la ni mah se an khelh danah Carrick-a tan lawmna tur a awm. Rawlthar duhawm Shea Lacey-a'n penalty a hlawh chhuak a, mual sirah a hmuhnawm tel avangin first team-a awm tlak a ni tih a pholang.

Stockholm-a inkhelah United-in first half an thunun a, midfield-ah Mason Mount a pawimawh a, World Cup-a Ivory Coast tana che ṭha Amad Diallo pawh a a che ṭha. Kum 15 mi JJ Gabriel pawhin goal hnih khungtu Mbeumo a rawn thlak a, hun rei lote chhungin theihna sang tak a nei tih pholang mah se thahrui erawh a la ngah tawk lo.

Man United hian August 8, Inrinni zan dar 8:30 hian PSG nen friendly match an khel leh ang a, August 12, Nilaini zanah Leeds United nen an inkhel leh dawn. Carrick-a hote hian Premier League-a an match hmasa berah Hull City an hmachhawn dawn a, hemi hma hian Ruben Amorim-a enkawl AC Milan nen (August 15) season thar inpuahchahna atana friendly match hnuhnung ber a ni ang.