India aiawh thei Jeho-a chak lo

Commonwealth Table Tennis Championship 2026-ah India aiawhin Jeho Himnakulhpuingheta a tel a, Central YMA Table Tennis champion hi Mizo zinga TT senior level-a India aiawh khel hmasa ber a ni. Jeho hian Mudit Dani (India) chu 4-0 a hnehin pre quarterfinal lut mah se Inrinni khan Australia aiawh Nicholas Lum lakah 4-0 in an chak lo.

Inelna hi New Delhi-ah neih a ni a, India aiawh TT khel tur hi mipa leh hmeichhia panga ve ve thlanchhuah a ni. Jeho hian qualifying round (group stage)-ah Payas Jalal (New Zealand) leh Jutras Vigneault Laurent (Canada) te nen an awm ho a, anni pahnih hi 3-0 leh 3-1 in a hneh. Laurent hi kum 2025 khan Canada U19 champion a ni a, 2026 North American men’s doubles championship-ah pawh gold a la tawh a, ITTF men’s singles-ah world no. 165 a ni mek.

Mizo tlangval hi round of 64-ah a bye a, round of 32-ah Indian pui Mudit Dani hmachhawnin 4-0 in a hneh. Round of 16-ah Australian Lum lakah a vanduai zawk. Jeho chuan, "Lum hi player ṭha tak a ni a, Chinese rubber a hmang a, forehand-ah a vir emaw ka tih kha a vir lo a, a changin a rawn vir leh viau mai bawk si a, a har a ni," tiin a sawi. Last game-ah Jeho hian 8-5 in hma a hruai hman a, Lum hian a rawn lehthal leh ta tho.

India mipa ranking-a no. 9 Jeho hian medal la pha lo mah se India aiawha tel phak hrim hrim hi hlawhtlinna a ni a, Mizo TT player-te tan sulsutu ṭha tak a ni. Commonwealth Table Tennis Championship hi July 27, Thawhṭanni khan Thyagaraj Stadium, New Delhi-ah khelh ṭan a ni a, nimin khan khelh zawh a ni.