Rindika 'Saikhamakawn' hmaah Ganggam SC

I Day Football-ah Saikhamakawnin nikum khan final an lut a, kuminah coach Lalrindika Hmar la lutin beseina an nei sang hle. Vawiin chawhnu dar 1:30 hian Saikhamakawn hian Manipur club Ganggam SC an hmachhawn dawn a, knockout stage lut turin 'draw' a tawk.

Saikhamakawn hian an match hmasa berah Police an hmachhawn a, Lalmuanpuia hmangin goal khung hmasa mah se Police lamin Lalnunsanga (Talea) goal ropui hmangin hun tawp dawnah an chhanglet. Hei vang hian SSK hi quarterfinal lut turin point khat tal hmuh a ngai a, an chak lo a nih erawh chuan an tla dawn. Rindika hote hi thih leh dam inkar an ding.

SKK hian midfield-ah Champhai tlangval Vanlalmalsawmdawng-kima, Kiran Chhetri, K. Lalremmuana leh Joseph Lalṭhafela te an nei a, game mawi khel turin an ṭha tawk. Tlarhma lamah Lalrokima leh Lalmuanpuia (Giroud) te an neih bawk avangin champion thei tur team zinga mi a ni.

Chutihrualin Ganggam hi Manipur aṭanga I Day Football khel tura Aizawl rawn pan an ni a, hneh nei loa tlak nghal an tum lo ang. Churanchanpur club hi Mizoram Police lakah 2-0 in an chak lo a, SKK laka chak tur chuan an insiamṭhat viau a ṭul ang.