Police khingpui tur Manipur club

I Day Football-ah vawiin chawhnu dar 1:30 hian Mizoram Police leh Manipur club Ganggam SC te an inkhel dawn. Ganggam SC hi Churanchandpur club a ni a, Mizo hnahthlak pawh an ṭhahnem a, head coach Zom Gangte leh assistant coach Henry Gangte te enkawl a ni.

Tun ṭum inlenaah hian group khatah team pathum zel an awm a, Police hian match hmasa berah Saikhamakawn hmachhawnin 1-1 in an inhnehtawk. I Day Football 2024 champion Police tan result dang nghak loa knockout stage luh an duh a nih chuan chak ngei a ṭul dawn a, hei hian inkhel a tihmuhnawm sawt dawn.

Ganggam SC erawh eng chiaha ṭha nge an nih tih la hriat a ni lo a, vawiin hi an vawi khat inlanna tur chiah a ni. Kumin February thla khan Zomi Nam Ni Football Tournament-ah Ganggam hian George Kom-a goal hnih hmangin Zomi FC 2-1 hnehin an champion a, nuai hnih an hum haw bawk. Manipur club theihna hi Mizoram Police hmaah fiahina awm ang.