Futsal inelna ṭhahnem dawn

Mizoram Football Association hnuaia Futsal Commitee chuan 2026-27 MFA Futsal Calendar an ti chhuak a, tun season-ah club inelna bakah veng leh khua inelna te, school leh college inelna te leh veteran inelna te an buatsaih dawn.

August 17-28, 2026-ah Division One Season Opening khelh a ni dawn a, September thlaah inelna a awm dawn lo. Inter-Village Tournament chu October 26 -November 10, 2026 chhunga khelh tura ruahman a ni.

Futsal League Season 8, Division One Season Ending, Inter School leh Veteran inelna chu nakkum February - March thlaah khelh a ni ang. Mizoramin football inelnaa hma a sawn a, AIFF Futsal Club Championship hnuhnung berah pawh Mizo club Tlangnuam FC an champion.