Rodri hliam zai a ni dawn

Manchester City midfielder Rodri chu a hnungzâng hliam zai a ni dawn a, a lo kir hun tur chiang taka sawi theih a ni lo - Spain tana World Cup nomawi chawi hlim Rodri tan chanchin lawmawm a ni lo a, City tan a lawmawm lo lehzual ang!

World Cup Golden Ball dawngtu Rodri hian City-ah hian kum khat chauh contract a nei tawh a, World Cup hma khan an rama kir a hreh loh thu a sawi. Real Madrid nen sawi zawm zui a ni a, mahse, Madrid hian lakluh tumna an neih loh thu an sawi thung.

City-ah Rodri hian kum khat khel turin contract a la nei mek a, City hian World Cup zawh ruala indawrna neihpui an tum. Mahse, amah ber hian contract pawhsei lam a awn lo nia sawi a ni a, a hun tawp lam chu an rama hman a duh ve tawh niin a lang.

Ballon d'Or pawh lo dawng tawh Rodri hian September 2024 khan ACL hliam neiin, 2024-25 season tluan deuhthaw chu inkhel thei loin a awm a, season hmasaah lo kir mah se, malpui hliam leh ṭhal hliamin a tibuai zui a, match a khel tam lo.

City-in league match 38 an khelh zinga 17-ah chauh bul a ṭan a, tunah a hnungzang na vangin zai a ngai leh ta. City-ah contract thar a ziak lo a nih phei chuan Manchester khaw club-a a hun tawp lam chu damdawi in lamah a hmang tam zawk dawn tihna a ni!

Rodri hi World Cup-ah hmuhnawm khawpin khel mah se, kum 30 mi a ni ve tawh a, hliamin a tihbuai ve fo tak bawk avangin club lian zingah sawmtu a hmu tam lo a nih pawhin a mak lo ang.

Atletico Madrid midfielder hlui hian City hi kum 2019 khan Atletico aṭang hian a zawm a, Premier League (4), FA Cup (2), League Cup (3), FA Community Shield, Champions League, UEFA Super Cup leh FIFA Club World Cup-ah te champion nomawi a chawipui.