Hydration break ennawn a ni dawn - Wenger

Arsène Wenger chuan kum 2026 World Cup-a 'hydration break' an hman chu mipui duh zawng a ni lo tih a pawm thu leh, FIFA chuan tournament zawhah a nghawng hrang hrangte an zir chiang leh dawn tih a sawi.

Khaw chin chu eng pawh ni se FIFA hian USA, Mexico leh Canada-a inkhel zawng zawngah hydration break hi minute thum chhung an hmantir vek. Football thuneitu sang hian player te hriselna atana he thil hi ti an nih thu sawi mah se, mi tam takin inkhelh laia fakna hmanga sum lak luhna atana hman mai mai niin mipui tam zawkin an ngai.

FIFA head of global football development ni mek Wenger chuan, "A chang chuan mipuite'n hrehawm an ti ṭhin a, World Cup zawhah eng ang chiahin nge a nghawng hrang hrang a awm tih kan la zir chiang dawn. Inkhel result tidanglam tur khawp ni lo mah se, football ngainatute rawngbawl turin kan awm a, an duh danin thutlukna pawh kan siam tur a ni.

Inkhel tam takah, a bikin stadium chung khuhna neiah phei chuan mipuite an lungawi lo kher mai. Mahse intihsiakna ṭan hma aṭang tawha dan siam a nih tawh avangin thlak danglam leh thut a rem lo," a ti. Inkhel ṭhenkhatah chuan boruak nung lai a tihbuai avangin, hydration break neih a nih laiin mipuii an 'boo' hial.

Expert te tarlan danin US-a Fox Sports-a sorkar tana World Cup fakna neih man hi second 30 atan US dollar 200,000 leh $300,000 inkar a ni a, USA inkhelh ṭum leh final stage lamah phei chuan $750,000 a tling phâk.

European football body UEFA chuan hydration break hi kalpui lo turin thutlukna a siam tawh a, England manager Thomas Tuchel pawhin inelna tir lamah khan football nihna tibotu pakhat ti hialin a lo sawi tawh a ni.