Arsenal-in Stones an iai lo

Premier League champion Arsenal chuan an defender rinrawl, William Saliba chu hnungzâng hliam vanga hun rei tak an chân dawn avangin a hmun ruak hnawh khattu tur an dap a, defender an melh zingah John Stones hming a ri tel.

Kum 25 mi Saliba hi Spain laka a inhliam hnuah a chawlh chen tur hriatchian theih la ni lo mah se, thla li vel tal chu a chawlh a ngai dawn niin an sawi. Gunners-in Ezri Konsa an ngaihven a, mahse a hnampui Stones pawh free transfer-a an lak theih dawn avangin Mikel Arteta-a'n a iai lo niin khawthlang chanchinbuten an ziak.

Spanish coach Arteta hian Manchester City-a Pep Guardiola assistant a nih laiin, kum 32 mi Stones hi a lo enkawl tawh avangin a hrechiang dawn a, Premier League bakah Champions League-a tawnhriat ngah tak a nih avangin Saliba thlak nan ani tluk an awm bik lo.

England international Stones hian June thla tawp khan kum 10 chhung a awm hnuah City a chhuahsan a, Three Lions tan club nei lo chunga inlan hmasa ber niin World Cup a khel.

Season liam ta khan Stones hian hliam vangin a inkhel tam lo a, Novermber thla aṭang City tan vawi li chiah bul a ṭan. Mahse a tawnhriat bakah World Cup a hman ṭhat avangin Stones-a'n duhtu a ngah a, a agent-ten chuan sawmna a hmuh ho an ngaihtuahpui.

Arteta-a'n Premier League nomawi an kawl lai humhim a tum takzet a, chumi kawnga pui turin Everton defender hlui hi a duh. Mahse an bawhzui vat lo a nih chuan club dang lakah an chân leh a rinawm.

London club hian an rim lai Morgan Rogers chu Chelsea-in an chhuhsak dawn a, chuvangin Stones an duh takzet a nih chuan hma an lak vat a ngai tawh ang.