Barca leh Laporte indawr lo

Athletic Bilbao sporting director Mikel González chuan Aymeric Laporte-a chungchangah, Barcelona nen indawrna mumal an nei lo a, an defender hi lak tum lo turin a hrilh nghal bawk.

Kumin World Cup khelh zawh takah Laporte hi Pau Cubarsí nen Spain tan ban rinawm an ni a, goal khat chiah chhuahin an champion-na kawngah an pawimawh dun hle. Hemi vang hian Barca chuan nipui transfer-ah Laporte hi Cubarsi nen inkawp chhunzawm tura lak an tum niin Spanish chanchibuten an ziak nasa hle.

González chuan, "Laporte-a lak luh chungchangah Barcelona aṭangin eng thu mah kan la dawng lo a, club pahnih inkarah eng inbiakna mah a awm lo a, chanchinbu hrang hranga darh mekte hi thudik tak nen inzawmna nei lo thu thang satliah mai an ni.

Laporte hi season tharah pawh team tana pawimawh ber tur zinga mi a la ni a, tawnhriat ngah takte hi club tan a hlu takzet a, chuvang chuan chhuahtir hi kan ngaihtuah thleng chhin ngai lo," a ti.

Catalan club hian veteran defender Inigo Martinez an lo nei tawh ṭhin a, amah ang bawka an chhawr leh turin Laporte hi an duh niin a lang a, mahse La Liga-a an elpui Bilbao aṭanga lak chhuah a awlsam dawn lo.

Kum 32 mi Laporte hian Bilbao-ah a professional zinkawng a zawh ṭan a, season ruk a châm chhungin match 222 a khel hman a, 2017 khan Manchester City a pan. City-ah season ruk bawk khelin Pep Guardiola hnuaiah trophy chawi theih zawng zawng a chawi kim vek.

Saudi Pro League-ah 2023 khan Al-Nassr tan khel lehin season hnih hnuah Europe-ah a let leh a, a bul ṭanna Bilbao bawk a zawm. A kum tam ve deuh tawh mah se Laporte a la ṭha reng a, season liam ta kha inelna hrang hrangah match 30 a la khel thei a ni.