LeBron James-a hma hun chiang lo zel

NBA point score hnem ber LeBron James chuan season thara a khelhna turah thutlukna a la siam fel lo a, khawvel puma basketball ngainatuten James-a thutlukna siam hun nghakin an thlir ṭhup.

Thla hmasa khan Los Angeles Lakers hnenah team a chhuahsan tur thu James hian a hrilh a, free agent a nih avangin a duhna lam lam hawiin a kal thei a ni.

Kum 41 mi James hi club hrang hrang nen sawi zui a hlawh a, a lo khelh tawhna Cleveland Cavaliers leh Miami Heat bakah Philadelphia 76ers leh Minnesota Timberwolves te nen an sawizawm. Stephen Curry khelhna Golden State Warriors nen pawh thawm an nei hman a, Curry pawhin khelh dun a châk thu a sawi.

A khelh lehna tur an hriat châk avangin a fapa Bronny James chuan ngaihven a hlawh tel lo thei lo a, LeBron hian a fapa nena khelh duh a châk avangin a Bronny draft tu club-ah khelh a lo tum tawh a, mah se Lakers-ah an khel dun thung.

LeBron hi a kum tam ve deuh tawh mah se chuai lam a la pan lo a, season hmasa khan match 60 zet a la khel thei a, match khatah chawhrualin point 20.9, assist 7.2 leh rebound 6.1 a la nei thei a ni.

All-Star vawi 22 leh vawi li champion tawh James hian NBA-ah record thar siamin season 23 a khel tling tawh a, championship dang lak leh ngei a duh. Season hmasa khan Oklahoma City Thunder chu Conference semifinals-ah an hneh lo a, season tharah chuan champion thei tur team ṭha sa a zawm a nih pawhin a mak lo ang.