A hmun ngaiah Antonelli a let leh ta

Pathianni zan Belgian Grand Prix-ah Mercedes driver Andrea Kimi Antonelli chu pakhatna a ni a, a zawna vawi thum hnehna a chan loh hnuah lo kirin hnehna a rawn chang leh ta. Kum 19 mi Antonelli tan tun season-a vawi ruk pakhatna dinhmun a luahna chiah a ni a, podium-a vawi riat a lawnna a ni bawk.

Spa Francorchamps-a intlansiakah Antonelli-a'n bul a ṭan ṭha a, Max Verstappen, Charles Leclerc leh Lando Norris ten lehpel ve zeuh mah se a hmahruaina a hloh rei lo a, a tawp thlenga a ṭan mar theih avangin phu takin pakhatna a ni.

Antonelli chuan, "Hun harsa tak ka tawn hnuah a sang bera ka awm leh thei hi a nuam ka ti hle. Chak duhna leh phurna ka nei reng a, ṭha taka tlan chhunzawm zel a, result ṭha neih chhunzawm zel ka tum a, season tawpah eng nge thleng dawn kan thlir ang chu," a ti

Italian driver dawt chiahah Ferrari driver Leclerc a thleng a, pathumnaah Red Bull tan Verstappen a lang bawk a, Verstappen hi an ramah hnehna chang zo lo mah se, podium a lawn phâk avangin a tlan chhe hran lo.

Lewis Hamilton chu palinaah a thleng a, McLaren driver Oscar Piastri leh Lando Norris te chu pangana leh pasarihna an ni a, an inkarah Red Bull driver Isack Hadjar a awm bawk.

Hetihlai hian Antonelli-a teammate George Russell a vanduai a, lap khatna lekah Hamilton nen an intai avangin track pawnah a car a chhuak a, a tlan chhunzawm theih loh avangin hma takah track a chhuahsan nghal a, a tan inelna chhinchhiah tlak a ni lo.

Kum 28 mi Russell hi a chetsual leh tak avangin a teammate Kimi Antonelli chu point 50 zetin a umphâk tawh lo a, British GP-a pahnihna a nih hnu lawk khan Russell hian Antonelli nen a umna kawngah a vannei chho a, an inthlauhna a tihzim ve zel avangin a phur thu a sawi a, mahse tunah chuan an inthlau leh ta.

British driver chuan, "Tun season-ah ka chesual ngun em em a, chuvangin ngaiah ka nei deuh tawh. Mahse result duhawm lo tak ka nei a, a aia ṭhaa thawh chhuah leh nghal ka duh," a ti.

Russell taitu Hamilton chu hrem niin second nga paihsak a ni a, podium a lawn loh chhanah a ngaih theih. Mahse palina a nih phâk avangin table-ah point ngain Russell a lehpel. Hamilton bakah hian a teammate Leclerc chuan lap riatnaah McLaren driver Oscar Piastri a tai zeuh a, mahse buaina lian tham a thlen loh avangin hrem a ni ve lo.

July 26, Pathianni zan dar 6:30-ah Hungarian Grand Prix a awm leh nghal dawn a, driver ten hahdamna hun an ngah lo. Mahse Russell te ang beisei pha lo tan inelna awm leh nghal vat tur hi thil lawmawm a ni thung a, race 12 la awmah thil a danglam theih avangin tha thlah a thiang dawn lo.