Declan Rice dinhmun a chiang lo

England fan-ten Argentina nen an inkhelh hmain chanchin lawmawm lo hriat tur an nei a, an midfielder Declan Rice chu a inlan thei lo mai thei - Rice hi damlohna avangin a talbuai mek a, Norway pawh kha hmachhawn mah se, second half-ah a lut tawh lo.

Rice hi Mexico-a round of 16 an khelh khan a damlo ṭan a, Norway an hmachhawn hma khan coach Thomas Tuchel chuan a midfielder pawimawh hi ni thum zet khumah a mut thu a sawi - khelh ṭhat a har! Rice hian semifinal khelh ngei a duh a, mahse, medical team lamin thutlukna an la siam lo thung.

Arsenal midfielder hi Harry Kane leh Jude Bellingham te nen England player pawimawh bik tia chhal theih an ni a, Rice hi a inlan thei lo leh a nih ngat chuan Thomas Tuchel-a team rem dan tur hi hmuh a châkawm hle.

Tuchel-a'n Kobbie Mainoo a rin lohzia chu hriat sa a ni a, Rice awm lo pawh ni se, bul a ṭantir leh kher lo ang! Chuti a nih chuan midfield-ah right back Reece James chu bul ṭan tura beisei chi a ni a, Elliot Anderson nen an inkawp thei ang.

Rice a inlan thei a nih erawh erawh chuan Reece James hi right back lamah a insawn thlak a rinawm a, chuti a nih chuan Norway laka bul ṭan John Stones chu bench-ah a kir ang a, a laiah Ezri Konsa leh Marc Guehi an inkawp ang - Nico O'Reilly chu leftback tur a ni.

Tuchel-a'n Norway lakah tlarhnung ngaihtuah vangin Noni Madueke chu bul a ṭantir a, mahse, ani aiah hian Bukayo Saka chu bul ṭan leh tawh tura beisei niin, Anthony Gordon nen Bellingham an thlawp ang a, tlarhmaah Harry Kane a mal tlat ang.