Scaloni-a'n squad siksawi a tum
Argentina-in World Cup semifinal an thleng tawh chungin, beisei angin an la khel chhuak meuh lo. Switzerland laka an chak zawhah coach Lionel Scaloni pawh a hmai a uang lo hle.
Kum 2022-a Argentina champion puitu Scaloni hian inkhelh zawhah, "Dik taka sawi chuan kan talbuai hle. Ball inchuhah kan hneh lo vek a, a per min lak khalh zel bawk. Kan beisei ang level-ah kan khel lo a, match harsa tak zawng a ni e," a ti thlawt!
Scaloni hian Egypt nena an inkhelh zawhah khan, "Siam ṭhat ngai chu kan siam ṭha ang," a ti a, mahse, a beisei angin an insiamṭha lo tih tilangtu chu Switzerland nena an inkhel kha a ni.
England ang 'top team' lakah chuan vawi khat chetsual a pawi tawh dawn. Argentine coach pawh hian hei hi a hrechiang a, a training chhimtu journalist ṭhenkhat chuan Scaloni hian formation hrang hrang a enchhin niin an sawi.
Argentina hian 4-4-2 leh 4-3-3 an hmang tlangpui a, mahse, an training-ah chuan 5-3-2 an enchhin - he formation-ah hian Nicolas Otamendi, Cristián Romero leh Lisandro Martinez te chu back three-ah hmangin, Nahuel Molina leh Giuliano Simeone te chu right wing back-ah an inluh chhawk.
Left wing back-ah Nicolas Tagliafico leh Nicolas Gonzalez an inluh chhawk thung nia sawi niin, midfield pathumah Alexis Mac Allister, Rodrigo de Paul leh Enzo Fernandez te inkawpin, a hmaah Lionel Messi leh Julian Alvarez an inkawp.
Mahse, Scaloni tan inkhel tak taka formation siksawi chiam hi a ngamawm lo mai thei a, hetihrual hian a formation ngai a ring nawn a nih pawhin, Rodrigo De Paul leh Nahuel Molina te chu bul ṭan ṭhin zinga bench-a awm chance nei an ni.
Argentina hian dang pangngaia 4-4-2 an hmang a nih erawh chuan, inthlak danglam vak a awm lo ang. Goalkeeper Emiliano Martinez hi chu thlak rual a ni lo a, tlarhnungah Nahuel Molina, Cristian Romero, Lisandro Martinez leh Nicolas Tagliafico an inkawp ang.
Midfield-ah Leandro Paredes, Rodrigo De Paul, Enzo Fernandez leh Alexis Mac Allister awmin, Lionel Messi leh Julian Alvarez te chu bul ṭan dun tura beisei an ni.