De la Fuente hmabak World Cup

Spain coach Luis de la Fuente-a'n kum 2013 aṭang khan Spain youth team enkawl hna a thawk ṭan a, kum 2015 khan Spain Under-19 chu UEFA European Under-19 Championship-ah champion nomawi a chawipui.

Spain U19-a a enkawl zingah hian Mikel Merino, Unai Simon leh Rodri te an tel a, player pathum hi tun World Cup squad-ah hian an la awm.

De La Fuente hian kum 2019 khan Spain U21 chu Euro-ah bawk a champion pui leh a, kha champion team-ah khan tuna World Cup squad ami Unai Simon, Fabian Ruiz, Merino, Dani Olmo leh Mikel Oyarzabal te an la tel.

Kum 2020 Olympics-ah khan De la Fuente hian Spain kaihruai lehin, silver medal an la a, tuna a squad-a awm player zingah Unai Simon, Marc Cucurella, Martín Zubimendi, Merino, Oyarzabal, Pedri leh Olmo te ho an awm bawk.

Spanish coach-in naupan lai aṭanga a hrual tawh player engemaw zat senior team-ah a enkawl zui a, a player-te a hrechiang hle tih a hriat - age level team-a a hlawhtling ang chiahin senior team-ah a hlawhtling zui a, mahse, nomawi chawi loh a la nei a, chu chu World Cup a ni.

De la Fuente hian age level-ah Spain naupang rual a hlawhtlinpui a, senior team-ah pawh UEFA Nations League leh Euro-ah nomawi a chawi tawh. Mahse, World Cup erawh a vawi khat hmachhawnna a ni a, nomawi a la chawi lo - a vawi khatnaah a champion pui nghal thei a nih chuan he coach hian Spanish football-ah hriat reng a hlawh tawh ang.